All Manipur Working Journalists’ Union-ten Journalist beih an dem

All Manipur Wor­king Journalists’ Union (AMWJU) chuan thu­chhuah siamin JAC-ten Imphal East District Hospital sawn duh lohna an lantirna cover tu local news channel staff N. Sanajaoba beih a ni chu an dem thu an sawi.

AMWJU thuchhuah chuan N. Sanajaoba chu lunga vawm a nih thu an sawi a, duh lohna lantirtu zinga miin a vawm thu an sawi bawk. He thil thlenna hi Yumnao Patlou aṭanga metre 100 vela hlaah a nih thu sawiin Sanajaoba hian kawng dangtute chu journalist a nih thu pawh hi a hrilh niin an sawi bawk.

Lunga vawm tu chuan journalist a nih thu a sawi pawhin engamah a ngaih loh thu an thuchhuah chuan an tarlang a, nutling rual pawh hian pawikhawihtu hi hum an tum bawk tih an sawi. Mahse journalist beih chu thil pawi tak a nih thu leh an chungah na taka action lak theih a nih thu an sawi hnuah chuan lunga vawmtu chu WaikhomTomnjao a nih thu a sawi tih an tarlang bawk a ni.

AMWJU chuan pawikhawihtu chu ni hnih chhung ngaihdam dilna hun an pek thu leh hun pek chhunga ngaihdam a dil loh chuan a lakah action lak a nih dawn thu an sawi a ni.