Assam : June aṭangin in tinah bawlhhlawh lakhawm dawn

Assam-a Dibrugarh Municipal Board (DMB) chuan thuchhuah siamin June 1 aṭangin in tinaa kala bawhhlawh lak­khawm hna, door-to-door waste collection an ṭan dawn thu an sawi a, hei hian chenna in mai bakah khawchhunga commercial establishment-te leh sorkar office-te thlengin a huam dawn a ni.

District thuneitute chuan Thakurthan leh Lekai-ah te solid waste management plant siam tura ruahmanna an neih thu an sawi a, mahse hei hi pawl ṭhenkhat leh tualchhung mi ṭhen khatin an dodal niin an sawi. Dibrugarh-ah hian solid waste-management project kalpui a la nih loh avangin bawlhhlawh paihna hi an buaina lian ber pakhat a nih thu report chuan a tarlang.

Board chairperson Soma Chakraborty chuan Door-to-door waste collection service hian khaw chhunga ward 22 a huam dawn a, e-rickshaw 25 leh tricycle 15 hman a ni dawn niin a sawi.

Dibrugarh khuaah hian chawhrualin nitin bawlhhlawh metric tonne 62 vel paihchhuah ziah a ni ang a ni a, heng bawlhhlawh thenfai hna hi NGO kutah te dah a ni ṭhin niin DMB official-te chuan an sawi bawk.

Chakraborty chuan an hma lakna chu Solid Waste Management Rules-2016 hnuaiah a nih thu a sawi a, tuktin khawchhung mipui ten bawlhhlawh an paih theihna tura tih a nih thu a sawi a ni.

Chairperson chuan bawlhhlawh paihna tur chu hmun hnihah ṭhen hran a nih dawn thu sawiin, a hring leh a pawl-a ṭhenhran a nih dawn thu a sawi a, a pawl chu bawlhhlawh ro paihna tur a nih thu leh a hring chu bawlhhlawh hnawng paihna tur a nih thu a sawi bawk.