Assam : Doctor 2,000 chuangten nawrh huaihawt

Assam Medical Service Association (AMSA) chuan sorkara an thil phut hrang hrangte nawrna atan Thawhlehni aṭang khan nawrh an huaihawt ṭan. Doctor 2,000 chuang an nawrh vang hian outpatient department (OPD) service pawh a buai phah nghal hle.

AMSA hian zing dar 8 aṭanga dar 11 thlengin OPD an boycott a, hei vang hian sorkar hospital hrang hrangah healthcare service a bahlah phah hle a ni.

Doctor-te thil phut zingah hna ruak hnawhkhah leh promotion chung changte pawh a tel a, a hmain sorkar nen pawh ṭum eng emaw zat an lo inbe tawh a ni. AMSA assistant general secretary, Dr Makhan Ch Saikia chuan, "Sorkar hian vawi tam tak lo tiam tawh mah se, doctor-te hi promotion pek an ni lo. Doctor tinte tan time scale promotion kan duh a ni," tiin state chhunga junior aṭanga senior level theng doctor post ruak 1,000 vel a awm thu leh, hengte hi a rang thei anga hnawhkhat tura an phut thu a sawi.

Saikia chuan senior doctor tam tak chu joint director leh sub-divisional medical officer-ahte kum 10 chuang an awm hnuah pawh kaisan tir an ni lo tih a sawi.

Senior doctor, post-graduate (PG) degree neite hlawh chu siamṭha turin an phut bawk a, "PG doctor lak thar ṭhenkhatte chuan qualification in ang reng tho, senior doctor-te aiin hlawh an la hnem zawk. Hei hi healthcare system tana rorelna dik lo tak a ni," tiin hlawhbi siam dan chu siamṭhat an phut bawk. AMSA thil phut dang zingah hian Srimanta Sankaradeva University of Health Services hnuaia doctor, PG ti mekte tana increment pek a tel bawk.

AMSA chuan hun rei tak an thil phut hi tihhlawhtling turin sorkar an nawr tawh tih an sawi a, hripui len laia hah leh rim taka mipuite tana an thawhnaah duhsakna leh hamṭhatna hran an dil lo tih sawiin, a hma aṭanga an thil phut tawhte hi ngaihtuahsak turin an phut tih an sawi.

Thawhlehni vek khan state health minister Keshab Mahanta chuan AMSA aiawhte hi biain, an thil phut hrang hrangte a sawipui. AMSA palaite hi president Nanigopal Saharai leh general secretary Kanak Chandra Talukdar-ten an ho a ni. Minister Mahanta chuan doctor-te thil phut ṭhenkhat tihhlawhtling turin sorkar chuan hma a la mek tih a sawi.