Tuialhthei-a VAT lak tihniam turin Meghalaya sorkar phut

Meghalaya-a Hynniewtrep Youth Council (HYC) chuan fuel man sang zel a ziaawm theihna turin Meghalaya sorkar hnenah value added tax (VAT) a lak zat chu tihniam turin an phut.

HYC chuan sorkar laipuiin petrol litre khat-ah excise duty Rs 32-33 a la a, state sorkarin VAT Rs 22-23 a lo la leh bawk tih a sawi. Diesel litre khatah sorkar laipuiin chhiah Rs 31-32 lain, state sorkarin VAT Rs 13-14 a la bawk a ni, a ti.

"State chhungah ni eng emaw zat aṭang khan petrol litre khat man hian digit thum a tling tawh a, hei hi ngaihtuah ngai tak a ni," tiin HYC general secretary Roy Kupar Synrem chuan a sawi. State sorkar chu tuialhthei man sang zel avanga mipuite an tawrhna tihziaawm a nih theihna turin petrol leh diesel-a VAT a lak zat chu 50%-a tihniam tura an phut thu a sawi a ni.

Pressure group hrang hrang leh eptu party, Cong­ress pawhin state sorkar chu tuialhthei-a VAT lak tihniam turin an lo phut tawh bawk. Thma U Rangli-Juki (TUR) chuan central-a BJP kaihhruai sorkar leh state sorkar chu tuialhthei man sang zel thunun thei lohah an puh a, mipui nawlpuite harsatna a thlen phah a ni, an ti.