NE Railway hmasawn nan project 43 kalpui a ni dawn : Railway Minister

Minister of State for Railways Rajen Gohain chuan Thawhlehni khan hmarchhaka railway hma­sawnna tur project 43 kalpui a nih dawn thu a sawi a, heng project atan hian cheng vaibelchhe 9,000 vel hman a nih dawn thu a sawi.

MoS chuan railway project hmang hian hmarchhak hmun hrang hrang leh ramchhung hrang hrang te chu a inkalpawh thei dawn tih a sawi bawk.

Rajen Gohain chuan heng project zinga 25 hi chu rel kawng thar siamna tur project a nih thu sawiin rel kawng chu km 5,100 vela thui siam belh a nih dawn tih a sawi a ni.

Gohain hian bi-weekly Humsafar Express train, Agartala leh Bengaluru inkara tlan tur a vailiamnaah heng thu hi sawiin Ministry chuan hmarchhak railway network zawng zawngah electrification an ti vek dawn tih a sawi.

Minister chuan hmarchhak state hrang hrang khawpui zawng zawng te chu rel hmanga kalpawh vek a nih theihna turin hna thawh mek a nih thu a sawi a, Northeast Frontier Railway (NFR) pawhin Bangladesh-a Chittagong kalpawh a nih theih nan Tripura chhim lam ramri-ah rel kawng km 112-a thui an siam belh tawh thu a sawi bawk.

He hunah hian Tripura Chief Minister Biplap Kumar Deb pawhin thu sawiin Gohain hnenah chuan Tripura leh ramchhung hmun hrang hrang kalpawhna tur rel hrang hrang service tir turin a ngen bawk a, Rajdhani Express pawh nitin service tir a harsa deuh a nih pawhin karkhata vawihnih tal service tir dan tur ngaihtuahpui turin a ngen bawk a ni.

Feni lui chunga lei dawh mek pawh Decem­ber 2019-ah chuan zawh hman a nih tawh dawn thu sawiin lei dawh zawh a nih hunah chuan Tripura chu hmarchhak kawngkapui a nih tawh dawn thu leh Bangladesh tan pawh kawngka berah hman a nih theih tawh dawn thu a sawi bawk.

He hunah hian Tripura Tran­sport and Tourism Minister Pranajit Singha Roy, Forest and Tribal Welfare Minister Mevar Kumar Ja­matia bakah NFR General Manager Sanjive Roy te pawh an tel.