Tripura tui len vangin mi 17,000 vel sawnchhuak

Tripura-a West Tripura, Gomati, Khowai and Sipahijala district-a tuilian chuan kiam lam pan mah se mi 17,480 vel chu an chenna in aṭangin an insawnchhuak tih State Disaster Management Authority ( SDMA) officer Sarat Das chuan a sawi.

Tripura-a lui pahnih Gomati leh Haora-te chu hlauhawm chhin­chhiahna, danger level hnuaiah an luang tawh tih a sawi bawk.

Das chuan tui a len belh thu dawn a awm tawh loh tih sawiin Haora chu metre 9.48 velah a luan tawh thu a sawi a, danger level chu metre 10.50 a nih thu a sawi. Goamti lui pawh metre 19.80-a a luan tawh thu a sawi a, danger level chu metre 21.50-a nih thu a sawi a ni.

Hetihlai hian Thawhṭanni khan ruahsur nasa avanga leiminah mi pahnih in nunna an chan thu a sawi bawk a, tui len thut avang leh ruahsur nasa vangin hmun hrang hrangah leimin a tam thu a sawi bawk.

Das chuan mi eng emaw zat chu an chenna in lamah an kir ve leh tawh bawk niin a sawi a, hetih lai hian tui lian hian kiam lam pan mah se a la kiam zawh loh avangin mi tam takin harsatna an la tawk nasa hle tih a sawi.

Local meteorological department chuan ruah nasa tak sur thei dinhmun­ah an la din thu sawiin ṭek leh ruahpui a la sur thei reng niin an sawi a ni.