Nagaland : NDPP, BJP ten ECI-ah NPF complaint

Nagaland-a rorellai Nationalist Democratic Progressive Party (NDPP) leh Bharatiya Janata Party (BJP) ṭangrual pawl PDA sorkar chuan Election Commission of India hnenah Naga People’s Front (NPF) chu complaint in model code of conduct bawhchhiaah an puh.

Chief Election Co­mmi­ssioner, Election Commission of India (ECI) hnena lehkha an thawnah NDPP Election Agent, Prasielie Pienyu chuan NPF president Dr Shurhozelie Leizietsu chu hnam leh hnam inkara thil pawi thlen thei zawnga thu sawiah puhin ziakin a complaint a, model code of conduct bawhchhia-a puhin a lehkhaah hian May 19-a thawn a nih thu a inziak.

BJP pawhin hemi chungchangah tho hian NPF Chief hi hekin May 22 khan Chief Electoral Officer, Kohima, Nagaland hnenah hekna lehkha an thawn ve bawk a, heng lehkha thawn pahnihah an thuziah chu a inang deuh reng a, NPF President lakah hian action la tura an duh thu an ziaklang tel bawk.

Lehkhathawnah hian NPF president hian May 15-a Ura Academy Hall, Kohima-a thu a sawina, Lok Sabha Campaign a neihnaah Kristian te chu RSS ten an tiduhdah nia sawiin RSS hi BJP political wing pakhat an nih thu a sawi a, PDA an vote dawn a nih chuan Hindu an ni tih ang deuh thawa thu a sawi thu leh Naga mipui leh secularism ṭanna bakah Kristian tana vote an thlak duh a nih chuan Jamir chu an vote tura a ni tia thu a sawi thu an ziak.

Dr Shurhozelie Leizietsu, NPF President thusawi chuan tharum thawhna leh insual buaina te a thlen thei dawn niin a inziak bawk a, ralmuanna leh dikna leh muanna commission in a tir aṭanga kalpui a duh chu a tichhe thei tih an ziak bawk a ni.

NPF Chief thusawi chuan hnam leh hnam inkarah thil pawi a thlen theih thu ziak telin hei hian model code of conduct a bawhchhe thei tih an ziaklang bawk a, Dr Shurhozelie Leizietsu lakah chuan action la turin NDPP leh BJP-te chuan ECI chu an duh thu leh FIR thehlut tura an duh thu te pawh an ziak bawk.

Hemi bakah hian ECI chu state sorkar leh district thuneitute chu public meeting, public procession, public rallies, road show-te buatsaih phal lo tura thupe turin an ngen bawk a ni.

May 22-a complaint an thehluhah hian NPF Candidate C Apok Jamir chu model code of conduct bawhchhiah an puh bawk a, Naga mite tan a ran thianghlim Mithun (lawi) semah an puh bawk.

NDPP chuan election model code of conduct hman a nih laia Mithun lo sem chu IPC Section 171 (B) leh 171 (E) bawh­chhiatna a nih thu an ziak.

NDPP general secretary Benjamin Lorin chuan hetiang taka model code of conduct an bawhchhiat nasat avang hian ECI chu action la ngei tura an duh thu a sawi.

ECI hian April thla khan Nagaland Lok Sabha by-poll election hi May 28 hian neih a nih dawn thu thuchhuah an lo siam tawh a, Nagaland LS seat hi Chief Minister Neiphiu Rio-an assembly inthlan dawna chief ministerial candidate a nih dawn avang khan a chhuahsan avangin a awl a ni.