Manipur CM in online pension system tlangzarh
Manipur Chief Minister N. Biren Singh chuan Thawhlehni khan online pension system a tlangzarh a, he system hmang hian public financial management system portal kaltlangin pension hlawh te pek a ni thei dawn a ni.
Chief Minister chuan kum lama upa te chuan hamṭhatna an dawn tur chu he system hmang hian awlsam zawka an dawn theih dawn thu leh, thil kalpui dan langtlang zawka a awm tawh dawn thu a sawi a, Socio-Economic Caste Census aṭanga a lan danin ramchhungah pensioner nuai hnih chuang hamṭhatna hmu thei an awm laiin 56,000 chauhin hamṭhatna an hmuh thu a sawi. Thuneitute chu pensioner zawng zawng he system thar hnuaiah hian dah vek turin a ti bawk.
Biren Singh chuan sorkarin in tinah service hi a thlen theih nan RuPay card an buaipui mek thu a sawi a, bank zawng zawng chu RuPay card pechhuak tura hriattir nghalin pensioner-te hian an ham-ṭhatna hi a rang thei ang bera an hmuh theih nana hma la turin a chah bawk a ni.
Minister for social welfare Nemcha Kipgen pawhin thu sawiin, system thar an tlangzarh hmang hian middleman awm loin a hlawkna tel tur dik takin an tel nghal thei dawn tih a sawi. Online pension system hmang hian awlsam zawk leh chak zawkin hamṭhatna dawng tur te hnen a thleng thei dawn a, midang lo khawihbuai thei lakah a him zawk bawk niin a sawi.
He system tlangzarhna hunah hian Special secretary and financial adviser, rural development, Jaideep Govind, J. Suresh Babu, chief economic adviser, rural development, chief secretary Sudhakar Shukla leh director of social welfare Jacintha Lazarus-te pawh an tel a ni.