Citizenship (Amendment) Bill, 2016 dodal zel

Citizenship (Amend­ment) Bill, 2016 dodalna chuan ziaawm lam pan thei lo a, Thawhṭanni pawh khan hmarchhak hmun hrang hrangah Bill duh lohna lantir nan hian zirlai za chuang an pungkhawm leh.

Arunachal Pradesh, Mizoram, leh Nagaland-a zirlai pawl lian ber ber te chuan Bill hi dodalin an state khawpui ṭheuhah sit-in protest an nei a, Bill hi pass an duh loh thu an tarlang a ni. Zirlai pawl-te hian an state governor-te hnenah bill an duh loh zia memorandum-te pawh an thehlut bawk niin report chuan a tarlang.

Citizenship (Amendment) Bill, 2016 hi Lok Sabha-ah Citizenship Act, 1955 siamṭhat nana pharh a ni a, he Bill hnuaiah hian Afghanistan, Bangladesh leh Pakistan mi ramchhunga kum ruk awm tawh chin te chuan khua leh tui nihna an nei thei dawn a ni.

Itanagar-ah chuan All Aru­nachal Pradesh Students’ Union (AAPSU) chuan an thil phut hi tihhlawhtlin a nih hma chu sorkar an nawr zel dawn thu an sawi a, AAPSU president Hawa Bagang chuan sorkar laipui chuan ram leilung fate a ngaipawimawh lo hle tih a sawi. Bagang chuan Bangladesh raltlan, ramchhunga dan loa awm te chu an chhuah a hun tawh tih a sawi.

Kohima-ah pawh Naga Students’ Federation (NSF) chuan slogan te kengin central sorkar in Lok Sabha-a he bill an pharh an duh lohzia thute an tarlang.