Meghalaya : Regional force-ten NPP an thlawp

25th May, 2018

Meghalaya Regional Party Hill State People's Democratic Party (HSPDP) leh People's Democratic Front (PDF) te chu Nilaini khan Sapthoka, Chondonpara leh Joyfur-ah te National People's Party (NPP) tana campaign in NPP Candidate Clement G. Momin chu an thlawp thu leh regional party-te chu chief minister Conrad K. Sangma hnuaiah an inpek thu an sawi.

Joyfur thingtlang khuaah hian PDF party hruaitu Banteidor Lyngdoh chuan Conrad K. Sangma hnuaiah hmasawnna kawng an zawh ṭan mek thu sawiin Ampatu constituency-a inthlanna awm turah pawh hnehna an chan ngei a rin thu te, thu lawmawm lam hlir an hriat thute a sawi.

Lyngdoh chuan Congress party chuan an campaign-naah dawt thu thehdarh in regional party-ten an thlawp nia an sawi chu thu dik lo a nih thu leh PDF chu NPP nen an thawhho tlat thu a sawi bawk.

Regional force-te leh Indenpendent MLA, Meghalaya Democratic Alliance (MDA) hnuaia awm te chuan Clement G. Momin chu an thlawp tlat thu an sawi a, MDA sorkar pawh chuan an term an hman zawh dawn thu leh engmah hlauh an neih loh thu an sawi a ni. Lyngdoh chuan an sorkar chu a chakin a tluang hle niin a sawi bawk a ni.

Independent MLA leh Meghalaya State Planning Board Chairman ni bawk chuan 100% in an ṭanrual thu a sawi a, MLA 37 an neih thu leh Congress chu eptu pawl an nih zawk avangin thlawpin awmzia a awm loh thu a sawi ve bawk.

Regional party-te chuan thuchhuah chiang taka siamin Congress chu mipuite rilru sukthlek hruaikawi lo turin an chah a, Chief Minister hlui Dr. Mukul Sangma pawh sorkarna an siam dawn tia mipui a bum ṭhin chu titawp turin an chah a ni.

HSPDP MLA Renikton Lyngdoh chuan MDA chuan kum nga chauh ni lo chatuanin sorkarna an siam dawn thu a sawi a, Apati constituency chuan term ruk ngawt Mukul Sangma chu an thlantlin tawh thu leh hemi vang chauha Chief Minister a ni thei tih sawiin tunah politcs hamṭhatna a duh vangin a mipuite a kalsan chu thil dik a ni thei lo niin a sawi a ni.

Chief Minister Conrad K. Sangma pawhin Congres MLA ni lo, MLA dang zawng chu an ṭangrual vek nia sawiin an sorkar chu sorkar chak tak a nih thu leh sorkar inthurual tak an nih thu a sawi. Mipuite tana an inpumpek thu leh Congress dawt thutiam hmanga tlu lo tura mipuite chu a duh thu a sawi bawk.