Meghalaya: Ampati constituency chhungah NPP leh Congress intibuai

Meghalaya-a by-eletion neihna tur Ampati Constituency inthlan chu a hnai zel a, inthlan tur boruak sosang chho zelah Nilaini zan khan National People’s Party (NPP) leh Congress inkarah buaina a chhuak a, Betasing thingtlang khuaah buaina hi chhuakin party pahnih te hi an innawr buai.

Nilaini zan dar 8.30 vel khan party pahnih mi leh sa 100 bawr vel chu Betasibg-ah hian an insual buai a, police in an ṭhelh a ngai hial a, bungrua pawh a chhe nual niin report chuan an tarlang.

Report ṭhenkhat in an tarlan dan chuan NPP campaign lai hi Congress worker ṭhenkhat in an lo dan avangin buaina hi a chhuak a, nasa takin an insual phah a ni.

Superintendent of police, SWGH, Bobby Momin chuan police patrol-te chu party pahnih insual buai an hmuh velah hian an tlan nghal thu sawiin mi 100 vel lai mai an nih avangin ṭhelh mai pawh a harsat thu a sawi a, mi pa­khat erawh an sawisak nasat deuh bik avangin an chhan thu a sawi a, an mi chhanchhuah hi Congress mi Dharkan Sangma a nih thu a sawi bawk.

Dharkan Sangma hi Ampati Youth Congress president ni lai a ni a, police-ten Sangma hi an man tih thuthang lengvak a awm avangin Congress mi tam tak chu police outpost-ah an pungkhawm zui bawk a ni.

Bobby Momin chuan Sangma chu an man loh thu leh mi ṭhen­khatin an khawih rawn bik avanga an venhim zawk thu a sawi.

Police SP chuan zing dar 1 thleng party pahnih te hi an inhnial buai tih a sawi bawk.