Dan loa ramdang mi awm laka fihlim turin sorkarin hma la dawn : Assam Chief Minister

Assam Chief Minister Sarba­nada Sonowal chuan Ningani khan Assam sorkar chuan dan loa ramdang mi ramchhunga awm laka an fihlim theihna turin hma an la dawn tih a sawi.

Sarbanada Sonowal chuan an sorkar chu thutiam pahnih nei chunga thlan tlin an nih thu sawiin , corruption-free Assam leh illegal foreigner-free Assam chu an thutiam a nih thu a sawi a, heng an thutiam te tihhlawhtlin a nih theih nan hian theihtawp an chhuah dawn tih a sawi bawk.

Bharatiya Janata Party (BJP) kaihhruai sorkar in kum hnih office an luahna lawmnaa journalist-te nen inkawmna hun an neihah he thu hi a sawi a ni.

Chief Minister chuan National Register of Citizens (NRC) update chu an hmabak lian a nih hrih thu sawiin, June 30-a list an tihchhuah hnuah Citizenship (Amendment) Bill 2016 chungchanga an dinhmun pawh an tichiang dawn niin a sawi.

CM chuan mipuite chu chiai lo tura chahin engmah an zep dawn loh thu leh mipuite ngaihdan an thlir phawt hnuah thutlukna an siam dawn tih a sawi bawk.

Sonowal chuan sorkarna an chan kum hnih chhungin corruption case-ah sorkar official 74 an man tawh thu leh heng zingah hian IAS pahnih an tel thu a sawi a, Vigilance and Anti-Corruption department pawhin sorkar official-te lakah corruption case 66 an ziahluh tawh thu a sawi a ni.