Vawiinah Nagaland Lok Sabha bye-election nei dawn

28th May, 2018

Nagaland Lok Sabha bye-election chu vawiinah hian neih a ni dawn a, Nagaland-ah hian vote nei mi 11,97,436 an awm.

Vawiin inthlan turah hian PDA candidate, NDPP mi Tokheho Yepthomi leh C. Apok Jamir te chu an inkhing ang.

Vote nei mi 11, 97, 436 zinga 6,07, 589 hi mipa an ni a, 5, 89, 847 hi hmeichhia an ni thung tih Nagaland chief electoral officer Abhijit Sinha chuan press conference neihnaah a sawi.

Sihna chuan polling station 2,196 a awm thu sawiin polling station 211 chu him tawka ngaih a nih thu leh 260 chu venhimna uluk taka kalpui ngaihna a nih thu a sawi a, polling station dang 545 te chu dinhmun him pangngai takah a ding nia ngaih a nih thu a sawi bawk.

CEO chuan polling station 500 vel chu web casting emaw videography fixed camera emawa cover tur a nih thu sawiin, lirthei 4,000 vel inthlan buaipui nan hman a nih dawn thu a sawi.

Sinha chuan polling personnel 20,000 vel inthlan buaipui tur an awm thu a sawi.

Chief electoral officer chuan Nagaland mipuite chu vote thlak turin a ngen a, dik tak leh boruak muanawm taka vote thlak a, harsatna siam lo turin a ngen. Sinha chuan inthlanna muanawm tak neih a beisei thu a sawi bawk.

Nagaland Commissioner leh Returning Officer, M Patton chuan state chhungah dan leh thupek pawh pangngai taka kalpui a nih thu a sawi bawk a, dan leh thupek bawhchhe zawnga khawsa report an neih loh thu a sawi bawk.

Patton chuan campaign hunlaia RO office-a complaint lut te pawh police hnenah thlen a nih thu leh an chhuizui mek a nih thu a sawi a ni.

Nagaland Lok Sabha inthlan chungchanga hriattur awm te:-
1) Assembly bial vote tlemna ber : 27 Mokokchung town (7129)
2) Assembly bial vote tamna ber : 4th Ghaspani-I (65, 643)
3) Polling station vote tlemna ber : 60 Pungro-Kiphire AC a PS Kiuro khua (33)
4) Polling station vote tamna ber : 4th Ghaspani -1 AC (1440)
5) Women polling team awm zat : 253
6) Differently abled polling party awm zat : 2
7) P-2 polling station awm zat : 309
8) Polling station live web streaming tur zat : 225
9) Polling station offline videography-a cover tur zat : 275