NSCN(IM) hruaitu Arunachal-ah kap hlum

Naga hel pawl National Socialist Council of Nagaland-Isak Muivah (NSCN-IM) hruaitu pakhat, December 16, 2016-a security force-te beia mi pahnih in an thihphahnaa inhnamhnawih ngei nia hriat chu Zirtawpni khan security force-ten Arunachal Pradesh-a Londing district-a Ningu thingtlang khuaah an kap hlum.

Defence PRO (Kohima), Col C Konwer chuan Ningu khuaa Khonsa battalion-ten beihpui an thlak naah NSCN (IM) hruaitu zinga mi an kahhlum thu a sawi a, an mi kahhlum hi Pangang Gangsa anih thu leh tunhma chuan NSCN(K)-ah a tel ṭhin thu a sawi.

Gangsa hi an pawlah chuan sergeant a ni. Defence PRO chuan DAO Division kaihhruaina hnuaiah security force-te chuan beihpui an thlak thu leh an hmalakna hi Arunachal Pradesh chhim lama remna leh muanna a awm theihna tura an tih a nih thu a sawi a ni.

PRO chuan May thla tir daih tawh khan helai hmunah hian hel pawl ten buaina thlen an tum tih an dawn thu a sawi a, hemi anih avang hian beihlet dan tur leh lo dan tur an ngaihtuah nasa hle tih sawiin Col Konwer Zirtawpni pawh hian an thudawn an bawhzui thu a sawi bawk.

Konwer chuan an thudawnna chuan Ningu khaw bulah NSCN(IM) mi leh sa biru an awm tih an hrilh thu leh pawikhawihna thlen an tum thu an hrilh tih a sawi a, hemi a nih avang hian Khonsa battalion chuan beihpui an thlak tih a sawi.

Helho tawmna in lam an pan chuan hel pawl lam hian an kap hmasa tih sawiin a lo kap tu chu a au thu leh a ṭhiante chu tlanchhe tura a hrilh thu a sawi a, hemi hnu lawk hian in aṭang hian midang lo chhuak lehin security force-te chu a rawn kah thu a sawi a ni.

Konwer chuan security force-te chuan an kahlet ve naah tlanchhiat tum zinga pakhat chu an kahfuh thu leh midang erawh chu ramhnuai lamah an tlanchhiat hman thu a sawi.

An mi kahhlum ruang bulah hian silai mu, pistol, grenade leh ralthuam man a nih thu a sawi a, tlanchhe ta te pawh chu an zawn zui zel thu a sawi bawk a ni.