AAPSU-in state inrelbawlnaa inrawlh lo turin Chakma pawl hrilh

All Arunachal Pradesh Students Union (AAPSU) chuan Chakma Development Foundation of India (CDFI) leh Arunachal-based organisation dangte chu state sorkar inrelbawlnaah inrawlh lo turin an hrilh.

Arunachal Pradesh sorkarin Changlang district-a Chakma hnam awmte chhiarpui neih a tum chungchang, CDFI in dan kalh leh ram danpui bawhchhiatna nia a sawi chu chhang letin APSU general secretary Tobom Dai chuan, "State sorkarin Changlang district-a hma a lak tumna hi kum 1969 hnu lama state chhunga dan loa rawn lutte dapchhuah tuma hmalakna pangngai a ni. Hemi chungchangah hian CDFI leh pawl dangte hi an lo phunnawiin an dodal tur a ni lo," a ti.

Kum 1964-69 khan Chakma leh Hajong refugee te hi Bangladesh atangin Arunachal Pradesh-ah lutin mi 14,888 vel an ni a, kum 2011 chhiarpuiah khan 47,471 ah an pung tawh a ni.

Dai chuan state sorkarin chhiarpui neih a tum, CDFI-in sawisel a chi inthliarna lam hawi zawnga a sawi chu human rights leh thildang chhuanlama hmanga sorkar hmalakna lo dan a tumna hmanrua mai mai a ni, a ti.

CDFI hian tun hnaia thuchhuah a siamah, Chakma hnam bik chhiarpui neih tumna chu chi inthliarna, Constitution-a Article 14 palzutna dik tak niin a sawi a, state sorkar hmalak tumnaah hian prime minister Narendra Modi, union home minister Amit Shah leh RSS hotu Mohan Bhagwat te leh state chief minister Pema Khandu-te chu inrawlh turin an ngen.

AAPSU hruaitu chuan, "Sorkar chuan Chakma te duhdan ang zelin policy a siam vek thei lo. State leh central sorkarin an awmna hmun sawn sak chungchanga thutlukna an siamte pawh lawm takin an lo pawm ve mai tur a ni," a ti. Arunachal leh sorkar laipuiin Indian constitution hnuaiah an insawnna tur ṭha zawk a ngaihtuahsak chu engvanga dodal tlat nge an nih tiin Chakma hnamte chu a zawt let nghal bawk.

AP sorkarin Chakma leh Hajong refugee-te state danga sawn a tumna chu CDFI hian a lo hnawl tawh a ni. Heng hnam hnihte hi Bangalesh-a Chittagong Hill Tracts-a cheng ṭhin niin, kum 1960 chhoa an awmna ram tuiin a chim avanga India rama rawn tlanchhia an ni.