TMC hruaitute'n Tripura police hotu an hmu

Trinamool Congress (TMC) party aiawhte chuan Zirtawpni liam taa Agartala-a Amtali Bazar-a an party hruaitu leh member-te beih an nih chungchangah Tripura police hotu hmuin, kuthlaktute laka hremna lekkawh turin an ngen.

Police hotu hmu tura kal, TMC aiawhte hi party hruaitu Sushmita Dev leh Subal Bhowmik-ten an ho a, memorandum an thehlut nghal a ni.

TMC leader leh Rajya Sabha MP Sushmita Dev chuan Zirtawpnia pawikhawihna thlen dan chu dan bawhchhiatna lian tak, democracy palzutna leh a hma aṭanga lo ruahman lawk vek nia a lan thu a sawi. Dev leh TMC hruaitu dangte hi municipal election neih tur atana an campaign laiin beih an ni a, an motor hman pahnih pawh an tihchhiatsak tel bawk. Dev hi hliam a tuar avangin private hospital-ah hruai a ni bawk.

TMC chuan an party mi leh sate beih an nihnaah BJP chu an inrawlh niin an puh a, pawikhawihtuten TMC hruaituten campaign-na atana an hman motor an tihchhiatsak thlalakte pawh social media lamah thehdarh a ni.

Pawikhawihna thleng chungchangah BJP hruaitu, chief minister Biplab Kumar Deb leh union home minister Amit Shah-te an ngawih reng chhan zawtin, Tripura mipuite himna lam an ngaihtuah lo niin an sawi. State mipuite chuan rawng taka chetna thleng hi a chhanna an la pe ngei dawn a, police-te pawh dan kengkawhtu ni lo ang maia a sir a lo thlir mai mai tawh lo turin an ti bawk. State chhunga dan leh thupek dinhmun a tlachhe tawh hle tih sawiin, rorelna dik an phut thu an sawi bawk.