Fuel man sang duh lo in Shillong-ah black flag protest nei

Meghalaya-a Hyn­niew Youth Council (HYC) chuan an state-a tuialhthei man sang zel duh lohna lantirin Shillong-a Motphran-ah black flag protest an nei.

HYC hian "Mi hausate hausakna belhchhahna turin engvangin mi retheite chuan chhiah sang tak an pek ang", " India ram mipuite retheihna chhan chu sorkarin chhiah sang tak a pek tir vang a ni," tih thuziakte an keng bawk. Motphran-a motor tlante chu flag dum hi lo sem zelin, lungawi lohna an lantirna atana tar turin an ngen. Loudspeaker hmangin Meghalaya-a NPP kaihhruai MDA sorkar leh central-a BJP sorkar demna thute an aupui bawk a ni.

Meghalaya-ah hian a vawi khatna atan petrol man hian Rs 100 a kai tawh a, kar liam ta Zirtawpni khan petrol litre khat Rs 101.72 niin diesel litre khat Rs 95 a tling a ni. Fuel man sang zel khuahkhirh turin sorkar pawhin nawrna a tawk nasa hle a, state sorkarin fuel-a VAT a lak zat tihniam turin pawl hrang hrang leh eptu party te pawhin an lo phut tawh a ni.