Nagaland LS by-poll-ah vote 75% tla Political Party-ten inthlan ṭhat phut

Nagaland Lok Sabha bye-election chu Thawhṭanni khan neih niin hmun tlem azawngah buaina chhuak mah se inthlan hi tluang taka neih a ni.

Nagaland Commissioner leh Returning Officer ni bawk, M Patton chuan vote 75% a tlak thu a sawi a, inthlanna chu hmun tam berah ralmuang taka neih a nih thu sawiin vote pawh a tla ṭha thawkhat nia a hriat thu a sawi.

RO chuan Mokokchung district-ah erawh buaina a chhuah thu sawiin mi ṭhen­khatin 26 A/C Aonglenden hnuaia Polling Station No 13 Kubza chu an beih thu a sawi a, EVM machine (Ballot unit & Control unit) pawh an tichhia tih a sawi a, VVPAT erawh a him niin a sawi a ni.

Patton chuan he thil thleng kaihhnawihah hian mi pasarih chu Mokok­chung police-ten manin an hren mek thu a sawi. RO chuan helai hmunah pawh hian boruak thunun a nih tawh thu leh DC & ARO Mokokchung report an nghah mek thu a sawi bawk.

Patton chuan Mokokchung DC chuan buaina thlen lai hian vote 85% lai a tla hman tawh nia a sawi thu a tarlang a, DC chuan helai hmunah hian inthlan ṭhat leh a ṭul dawn nia a ngaih thu a sawi bawk a ni.

Assam police-te vanga buaina a chhuah fo na ṭhin Ladigarh-ah erawh RO chuan ECI in polling station dah a phal avangin an dah thu a sawi a, boruak ralmuang tak hnuaiah inthlanna an neih thu leh 80% velin vote an thlak thu a sawi.

Hetih lai hian May 25 aṭanga Thawhṭanni tlai dar 5 thleng khan complaint tam tak a luh thu RO chuan a sawi a, DC Mokokchung hnen aṭang pawhin complaint hi a luh thu sawiin DC chuan Media Certification leh Monitoring Committee phalna la lo in NPF-ten sakhuana lam hawi zawngin campaign an neih vangin a complaint tih a sawi a, he complaint hi Commissioner of Police, Dimapur hnenah thlen a nih tawh thu leh a ṭul anga action la tura tih a nih thu a sawi a ni.

BJP-te pawhin NPF Mokokchung unit lakah complaint an thehluh thu sawiin anni pawh hian DC complaint tho hi an complaint thu a sawi a, SP Mokokchung hriattir a nih tawh thu a sawi bawk.

NPF Election Agent S Akho Leyri pawhin complaint a thehluh thu sawiin Meluri, Khumiasu leh Lephori thinhtlang khuaa NPF-te chu NDPP chuan May 28 hmaa an franchise hman an khapsak niin complaint-ah hian a ziah thu a tarlang.

Leyri chuan heng khuaa NPF thlawptu (Meluri Christian Khel A, Meluri Christian Khel B, Meluri Non Christian Khel, Ri­choupe, Meluri Town A Wing , Meluri Town B Wing, Meluri Town C Wing, Meluri Town D Wing, Khumiasu leh Lephori) te hi an franchise hman phalsak an nih loh chuan inthlan ṭhat a ngai leh dawn a ni, a ti.

RO chuan heng case-te pawh hi DC Phek leh ADC Meluri te hnenah hriattir a nih tawh thu a sawi bawk.

NPF Election Agent hian Polling station No. 38, Lerie Colony Kohima-ah pawh inthlan­na neih ṭhat leh a ngiat bawk a, NPF thlawp­tute chu document pawimawh dang pawh nei mah se voter slip tel lo chuan vote thlak phalsak ve an ni lo niin RO hnenah hian a sawi a ni.

Polling party-te record endikna hi nimin chawhma dar 11 khan election district HQ ṭheuhah neih a ni. Vote hi vawiin hian chhiar a ni ang.