Manipur nula in ni 254 chhungin khawvel hel chhuak

Manipur Nula Lieu­tenant S. Vijaya Devi chu khawvel helchhuaktu team zingah telin, an team hi hmeichhia vek an ni. Hei hi hmeichhe hlang team in expedition India leh Asia-ah pawh an neih vawikhatna a ni. Lieu­tenant S. Vijaya Devi hi Narsishakti Award hlan a nih phah nghe nghe bawk.

Heng hmeichhe team-te hian lawng hmangin khawvel an helchhuak a, team-ah hian mi paruk awmin lieutenant comman­der, Vartika Joshi leh a deputy second in commander Parthiva Jamwal ten an kaihruai a, member dang te chu lieutenant Aiswarya Boddapati, lieutenant, S. Vijaya Devi, lieutenant, Swati P leh lieutenant, Payal Gupta te an ni.

Team hian ft. 55-a sei lawng INSV Tarini hmangin khawvel hi an hel a, Defence Ministry chuan twitter-ah INSV Tarini chuan mel 21,600 vel zet a zin thu sawiin, continent pali, cape pathum (Leeuwin, Horn and Good Hope) leh equator pawh vawihnih lai a paltlang thu an ziak a, he expedition hi Navika Sagar Parikrama tia vuah a nih thu leh women empowerment chawisanna tura sorkar hmalakna a nih thu an ziak.

Team-te hian Sep­tember 10, 2017 khan an zinkawng hi zawh ṭanin May 21 khan Goa an rawn thleng leh a, zin kawng harsa tak zawh mah se record tam tak pawh an siam bawk niin report chuan a tarlang.

Lieutenant Vijaya Devi hi Manipur-a Bish­nupur district huam chhunga Kwakta khaw mi a ni a, DM college aṭangin a graduate a ni.

Vijaya Devi chuan crew member zinga a naupang ber a nih thu leh ina siam chaw a eichak ṭhin thu a sawi a, lawnga chaw siam a hautak thu sawiin sik leh sa leh boruak vangin harsatna nasa tak an tawh thu a sawi. Heti chung hian engtin tin emaw hasatna hi an paltlang ve mai ṭhin thu a sawi a, a pianchamah pawh cake-te an ur niin a sawi. Hun remchang a nei leh a nih chuan hetiang expedition-ah hian kal leh a hreh loh thu a sawi bawk.

He expedition-a kal te hi an thlen hun hma thlakhata thleng tura beisei an nih laiin an steering gear chhiat vangin an khawtlai ta niin report chuan a tarlang a, expedition an neih chhunga data an lakkhawm te chu Indian Navy leh MET department tan thil ṭangkai tak a ni dawn nia sawi a ni. Team te hi Goa-ah Defence Minister N. Sitharaman in a lo hmuak a ni.

Prime Minister Narendra Modi pawhin a lo mikhual tawh bawk a, an hlawhtlinna chu ropui a tih thu leh a thinlung taka a lawmpui thu a sawi bawk. Expedition chu thil chhinchhiah tlak tak a nih thu leh India tan chauh ni lo khawvel pum tana thil chhianchhiah tlak tak a nih thu a hrilh a ni.