Meghalaya Ampati bye-election-ah vote tla ṭha

Meghalaya Chief Electoral Officer, FR Kharkongor chuan Ampti constitency bye-election chu Thawhṭanni khan tluang taka neih a nih thu sawiin vote a tlak ṭhat thu a sawi a, vote 90.42% a tlak thu sawiin report a luhkim hunah phei chuan hei ai hian vote tla zat hi an la tam a rin thu a sawi.

Kharkongor chuan polling station 39-ah inthlanna tluang taka neih a nih thu a sawi a ni.

Ampati Constituency-ah hian vote thlak thei inziak lut zat hi 28,699 an awm a, CEO chuan vote thlak tur hian mipui an punkhawm tam thu sawiin kum lama upa zawkte leh rualbanlo te pawhin vote hi an thlak tih a sawi.

Ampati constituency seat hi mi pathumin an inchuh a, Congress candidate Miani Dalbot Shira, Chief Minister hlui Mukul Sangma fanu upa ber ni bawk, NPP’s candidate Clement G. Momin leh Independent candidate Subhankar Koch-ten an inchuh a ni.

NPP candidate Clement hian hnehna a chan ngei a rin thu a sawi bawk.

Inthlan hma zan, Pathianni zan khan eptu pawl hruaitu Mukul Sangma chu Ampati constituency-ah hian a kal niin complaint a lut a, mahse CEO Kharkongor chuan official complaint erawh a dawn loh thu a sawi thung a, social media-a post chiah a hmuh thu a sawi.

CEO chuan hemi chung­changa thudik hre tur hian DEO leh RO-te chu hriattir an nih tawh thu a sawi a ni.