Tripura Indigenous group-ten Oct 15, 1949 aṭangin NRC ngiat

Tripura-a Indigenous group ‘ Twipra Dophani Sikla Motha ‘ (TDSSM)-te chuan Thawhṭanni khan National Citizenship (Amendment) Bill, 2016 duh lohna lantirna kawngzawh an nei a, Governor hnenah memorandum thehlut nghalin Tripura-a National Register of Citizenship (NRC) chu October 15, 1949 aṭanga chhiar ṭan tura an ngiat thu an ziak.

TDSSM member pakhat chuan National Citizenship (Amendment) Bill, 2016 an duh lohzia lantir nan Governor an hmuh thu a sawi a, hemi rual hian NRC pawh October 15, 1949 aṭanga chhiar ṭan an duh thu a sawi. A ram leilung fate zawk chu an state chhungah ngei hnam tlem zawk an nih tawh thu sawiin hemi chungchangah hian sorkar laipui chuan mawh a phur tur a ni a ti a, hemi a nih avang hian sorkar laipui pawhin NRC list a siam chu India-a Tripura a beh ni, October 15, 1949 aṭanga chhiar ṭan tura siam turin an duh tih an sawi a ni.