Covid-19 Hmarchhak dinhmun

Arunachal Pradesh-ah Covid-19 kai pali hmuh chhuah belh an ni a, anni nen hian hri kai hmuh tawh hi 61 an awm tawh. Mahse hri kai zinga pali chu enkawl dam an ni tawh thung. 

Health department chuan hri kai hmuh tharte hi Changlang district mi pathum leh East Siang district mi pakhat, an vaiin tunhnaia state dang aṭanga rawn haw vek an ni tih a sawi. Quarantine centre-a awm an ni a, an result hriat a nih hnuah Covid19 Care Centre (CCC) ah dah nghal an ni. 

Assam-ah hri kai hmuh tawh chu nimin khan mi 3,285 an tling. An zinga mi 1,249 chu enkawl dam an ni tawh a, enkawl lai mi 2,027 an awm. Assam-ah  hian Covid-19 hi mi parukin an thihpui tawh a ni. 

Hri kai hmuh belh zel an nih avangin Containment Zone pawh puan belh a ni bawk a, nimin khan Guwahati-a Ambari veng chu Kamrup (Metro) district thuneitute chuan Containment Zone-ah puangin, tlawhpawh khap a ni nghal bawk. Guwahati khawpui chhungah hian Containment Zone hi 24 a awm tawh a ni. 

Health minister Himanta Biswa Sarma chuan hri kai hmuh chhuah thar zingah hmun danga zinchhuahna nei lote an awm a, khawi aṭangin nge he hri hi an kai tih an chhui zui thei lo tih a sawi. Hei vang hian hri leng mek hi mipuiah a darh tawh nia hlauhthawnna pawh a sang hle tih sawiin, a bikin Guwahati khawpuiah mipuiah hri a darh tur vennan theihtawp an chhuah a ngai tih a sawi a ni. 

Assam-ah hian swab sample nuai 1.69 test a ni tawh a, heng zinga nuai 1.59 chu a negative a, sample 7,145 result nghah mek a ni. Hri kai hmuh tawh zinga 46.95% chu lower Assam mi an ni a, upper Assam-ah 19.5% awmin, central Assam-ah 13.8%, north Assam-ah 10.05% leh Barak Valley-ah 9.62% an awm.

Manipur-ah Nilaini khan hri kai hmuh chhuah belh pasarih an awm a, anni nen hri kai hmuh tawh hi mi 311 an tling tawh a ni. 

Nilainia hri kai hmuh belh zingah panga chu Imphal East district mi an ni a, Pherzawl district mi pahnih an tel. An vai hian state dang aṭanga haw vek an ni. 

Manipur-ah hian Covid-19 kai enfiahnaah sample 19,854 enfiah tawh a ni a, entry point-a screening centre hrang hrangah hmun dang aṭanga haw mi 2,60,097 chu endik an ni tawh bawk. 

Churachandpur police-te chuan Pherzawl quarantine centre-a awm mek zinga mi pathum chu  standard operating procedure (SoP) an zawm loh avangin thubuai an siamsak. An pathum hian Delhi aṭang haw vek niin, centre chhungah midang tana hnawksak zawnga an awm avang leh, centre SoP an zawm loh avangin thubuai hi siamsak an ni. 

Meghalaya-ah hri kai hmuh belh an awm lo a, hri kai hmuh tawh hi mi 44 niin pakhatin a thihpui tawh a ni. Covid-19 kai zinga 13 chu enkawl dam an ni tawh thung a, mi 30 enkawl mek an awm. 

Meghalaya police-te chuan Nilaini khan Shillong-a Covid-19 hospital-a doctor-te chunga mawi lo taka chea puh, US mi aid worker Theodore Maollem lakah thubuai an ziak lut. Mahse Maollem hian an puhna hi thu dik lo niin a sawi thung.

State sorkar chuan hri kai hi la pun belh zel mah se total lockdown kalpui a tum tawh lo tih a sawi. Deputy chief minister Prestone Tynsong chuan tuna  hman mek, khuahkhirhna tam zawk thlahdula lockdown kalpui chu June 30 thleng hman chhunzawm a ni dawn tih a sawi a ni. "Covid-19 darh tur venna atana lockdown hmasa ber kalpui a nih aṭang khan mahni inenkawl leh khawsak dan turte kan zir vek tawh. Tunah chuan fimkhur taka awm a, mahni inenkawl a, sorkar dan siamte zawm chu mitinte mawhphurhna a ni tawh a ni," tiin a sawi. 

Nagaland health minister S Pangnyu Phom chuan nimin khan an state-ah Covid-19 kai mi pahnih hmuh belh leh an nih thu a sawi a, he hri kai hmuh tawh hi mi 130 an awm tawh a ni. 

Minister chuan sample 293 endik zingah pahnihin hri an kai tih hmuh chhuah a nih thu a sawi a, Kohima quarantine centre-a awm lai ve ve an ni. Hri kai hmuh tawh zinga mi 22 chu enkawl dam ni tawhin, enkawl mek hi mi 108 an awm. 

Sikkim-ah hri kai hmuh belh an awm lo a, hri kai hmuh tawh mi 13 zinga pathum chu enkawl dam ni tawhin, enkawl mek mi 10 an awm. 

State nodal officer for evacuation/coordination Rinzing Chewang Bhutia chuan state sorkar chuan June 18-ah state chhunga quarantine centre-te  khar vek a tum tawh tih sawiin, hemi hnu lama state dang aṭanga hawte chuan anmahni sum chawiin inkhunghranna tur siamah an awm a ngai tawh dawn a ni, a ti. 

Bhutia chuan hmun danga tangkhan haw duh in register 11,831 zingah mi 6,332 chuan Sikkim an thleng tawh a, haw tum hi an tlem chhoh tawh avangin sorkar chuan he thutlukna hi a siam ta niin a sawi. Hemi rual hian state sorkar chuan haw duhtu tan June 18 aṭang hian bus a service tir dawn tih a sawi a, bus-a hawte hi Rangpo leh Melli check post-ah screening neih sak an nih hnuin, pawisa chawiin quarantine-na tur hmunah an awm tawh dawn tih a sawi.