Nagaland : ECI thupek angin Kubza-ah inthlang ṭha

Election Commission of India (ECI) chuan nimin khan thuchhuah siamin nimin vek khan Nagaland-a 26th Aong­lenden Assembly Con­stituency hnuaia Polling Station No. 13 Kubza-ah inthlang ṭha turin thupek a tichhuak a, zing dar 7 aṭanga tlai dar 3 inkarah inthlan ṭhat hi neih turin an ti.

Nagaland Commissioner leh Returning Officer I-Nagaland Parliamentary Constituency, M Patton chuan ECI thupek hi tarlangin ECI Secretary, Arvind Anand chuan CEO Nagaland hnenah inthlang ṭha tura thupek hi a thawn a ni.

ECI chuan an lehkhathawnah hian polling station 10-ah Presiding Officers ten mock poll laia vote tla zat Control Unit an la tihchian loh thu an ziaklang bawk.

Lehkhaah chuan mock poll VVPAT Voter Slip erawh lakchhuah a nih thu leh seal thlap a nih thu ziakin envelope bikah dahṭhat a ni tih a inziak a, hemi a nih avang hian heng polling station 10-ah hi chuan inthlan ṭhat a ṭul loh thu an inziak bawk.

Political party-ten polling station 17-a in­thlan ṭhat an ngiat chung changah CEO chuan DC leh ARO an hriat­tir tawh thu leh district thu­neitu lam hian inthlang ṭha tura thurawn an pek loh thu a sawi.

Nagaland Lok Sabha by-election inthlanna a district hrang hranga vote tla te hi vawiin hian chhiar a ni dawn a ni.