Tripura-a Lahari Debbarma suicide case CID kutah hlan dawn

Tripura state sorkar chuan Lahari Debbarma sui­cide case chu CID chhui­tir turin thutlukna an siam.

Deputy Chief Minister, Jishnu Devvarma chuan Thawhlehni khan Lahari Debbarma chenna in an tlawh zawh hnuah he thutlukna hi an siam thu a sawi a, Education Minister, Ratan Lal Nath leh Revenue Minister, N.C. Debbarma ten an ṭawi­awm a ni.

Lahari Debbarma hi Auxilium Girls School, Hazamura zirlai niin lehkha thiam thei tak a ni a, Tripura pawl 12 result chhuah tuk lawk, May 25 zingah khan a inthat a, amah hi an school-ah topper ni lai niin nakkum pawl 12 board exam hmachhawn tura inbuatsaih mek a ni bawk.

Deputy Chief Minister chuan a chhungte chu cheng nuai nga an pek dawn thu a lo sawi tawh bawk.

Lahari nu Dipali Deb­barma chuan Thawhṭanni zan khan FIR thehlutin Big Bazar leh Auxilium School chuan amah inthat tura an nawr luih thu a ziak a, hemi avang hian sorkar thuneitute hi an inah hian an leng ta a ni.

Hetih lai hian state chhung hmun hrang hrang­ah Lahari chunga rorelna dik an duh thu an lo tarlang ve bawk a, hmei­chhe naupang lehkha thiam thei takin ama nunna a la ngawt mai chu a chhan chhuichhuah ngei an duh thu mi tam takin an tlangau pui ve mek bawk.

Lahiri hi Big Bazaar-a an zirtirtute thlahna tur thil an lei naah thil rua puh a ni a, nasa taka a phat hnuah an zirtirtu in cheng 4000 senga a khulchhuah hnuah school lamah nasa taka hauh a nih thu sawi a ni a, hemi vang hian a rilru na chu a tukah a inawkhlum ta niin report chuan a tarlang.