Guwahati-ah Citizenship Bill duh lohna lantirin Hunger Strike nei

Citizenship (Amendment) Bill 2016 duh lohna kal zelah Thawhlehni khan Guwahati-ah mi sang chung pungkhawmin Hunger Strike an nei.

Assam Engineering College ground, Chandmari area-ah strike hi neih niin All Assam Students Union in an kaihruai a, pawl dang 28 velin an thlawp in an zawm ve nia hriat a ni a, heng zingah hian Asom Gana Parishad, Assam-a BJP kaihhruai sorkarna siamtu zinga mi pawh an tel.

AASU Adviser Samujjal Bhatta­charyya chuan thu sawiin Assam chu bawlhhlawh paihna hmun a nih lo, a ti a, bill vawi tam tak an duh loh thu an thlen tawh thu leh engpawh thleng se an pawm dawn loh thu a sawi.

Citizenship (Amendment) Bill 2016 Joint Parliamentary Committee-ten Assam an tlawh aṭang khan he bill dodalna hi nitin thilthleng a ni chho tawh a, pawh hrang hrang in bill hi nasa takin an dodal a ni.

Bhattacharyya chuan Bang­ladesh aṭanga ramdang mi an luh vangin Assam demo­graphic a tibuai zo tih a sawi a, sorkar laipui leh Assam sorkar chuan Assam Accord an zah tur a ni, a ti. AASU Adviser chuan March 24, 1971 hma lama Assam-a awm chiah chhinchhiah an ni tur a ni tih Assam Accord in a ziah chu pawm mai tur a nih thu sawiin sorkar laipui leh state sorkar in bill hi an pawm a nih ngat chuan nasa taka chet lak an tum tih sawiin a vau lawk a ni.