Naga talk-a sorkar palai thar a hlawhchham : NSCN-IM

Naga hel pawl, National Socialist Council of Nagalim-Isak-Muivah (NSCN-IM) chuan Naga peace talk-a sorkar laipui palai thar chu an beisei a pha lo a, Naga tana flag leh constitution hran an phut chungchangah an inbiakna chu a hlawhchham niin an sawi.

Naga peace talk neih mekah hian sorkar laipui chuan palai atana a hman, Nagaland governor RN Ravi thlakin, IPS officer hlui AK Mishra a ruat a ni. Naga helpawl leh sorkar laipuiten inbiakna an neihah hian an thil phut tam zawkah inremna siam thei mah se, Nagaland tana flag leh constitution hran siam an phutna erawh chu sorkar lamin a la remtihpui thei lo a ni.

Kum hnih dawn remna zawnga inbiakna chawlhsan a nih hnuah, sorkar laipui palai ruat thar hnuaiah thla hmasa khan NSCN-IM nena inbiakna hi an nei chhunzawm leh a ni. Mahse inbiakna chhunzawm a nih hnuah, helpawl lam chuan palai thar hnuaia inbiakna hi an beisei a pha lo hle tih Inrinni khan an sawi a ni. Thuchhuah an siamah, NSCN-IM chuan, " Beiseina sang tak neia inbiakna chhunzawn a nih hnuah kan sorkar laipui chuan Naga buaina chinfelna tur kawng ber chu a la dan zel avangin beisei a pha ta lo a ni," a ti. Flag hran an phutna chu puanzar pakhat ringawt a ni lo a, Naga-te tan an hnam an chhuanna leh hlutna an lantirna hmanrua a ni tih a sawi. Sorkar laipuiin flag chu 'cultural symbol' anga pawm a rawtna chuan a tilawm lo hle tih an sawi bawk. "Naga buaina hi cultural issue a ni lo a, India sorkar chuan Naga flag chu cultural symbol-a a thlak mai tur pawh a ni lo," an ti.

Naga movement hi India rama insurgency movement rei ber a ni a, kum 1997 khan sorkar laipui chuan NSCN-IM hi inkahhai a lo puanpui tawh a ni. Kum 2015 khan PM Modi kaihhruai sorkar laipui leh NSCN-IM hian inbiakna tharthawh lehin, he inbiaknaah hian Naga National Political Groups hnuaiah Naga armed outfit pasarihin an zawm tawh a ni. Inbiakna hi kum 2019, October 31-a zawhfel hman tura ruahman ni mah se inremna an la ziak thei lo. Kumin September thla khan sorkar laipui chuan palai atana a ruat, Ravi chu thlakin Mishra a dah thar a, inbiakna pawh kalpui chhunzawm thar lehin tun thla tir lam khan NSCN-IM palaite pawh Delhi-ah an kal a ni.