Mamata Banerjee-i'n Tripura BJP sorkar sawisel

West Bengal chief minister leh Trinamool Congress (TMC) hruaitu Mamata Banerjee chuan Tripura-a TMC hruaitu Sushmita Dev leh party worker dangte beih an nih chungchangah BJP kaihhruai sorkar chu na takin a sawisel.

Sushmita Dev hi veteran Congress leader Santosh Mohan Dev fanu a ni a, tun hnaiah Congress aṭangin TMC hi a zawm a ni. TMC hian Tripura lamah an party dinhmun sawhnghet a, tihchak tumin hma an la mek a, party hruaitute pawhin an tlawh fo a ni. Dev pawh hi Tripura-ah hian kalin, kar liam ta Zirtawpni khan Amtali-ah BJP member nia sawite chuan an lo bei a ni.

Mamata chuan Tripura-a rorellai BJP chuan eptu party mite lah sa chu bei zelin, hmeichhia pawh an khawih tel duh a ni, a ti. BJP duh lohna lantirte kawngzawhte chu hmanrua nei beih an ni a, TM worker hliam tuarte chu damdawi-ina enkawl pawh phalsak an ni lo tih a sawi. TMC worker pakhat, kut an thlak avanga hliam tuar chu hmanhmawh takin Kolkata-a SSKM Hospital-ah hruai a nih thu a sawi bawk.