AASU-in Lower Subansiri power project hna thawh tihtawp phut

All Assam Students’ Union (AASU) chuan Assam-Arunachal Pradesh border bul, Dhemaji district-a Gerumkamukh-a 2000 MW Lower Subansiri hydro-power project thawh mek chu tihtawp turin an phut.

Zirlai pawl hian Thawhṭanni khan Upper Assam-a Dibrugarh-ah mega dam project duh lohna lantirin nawrh an huaihawt a ni. "Expert panel pawhin he project hi Subansiri lui mawng lama awm, Lakhimpur leh Dhemaji district-a chengte tana a hlauhawm dante pawh an sawi vek tawh a, mahse Assam chuan hei hi ngai pawimawh loin hna a thawh chhunzawm tir reng tho a ni. Sorkar chu dam siam hna thawh mek hi titawp nghal turin kan phut a ni," an ti.

AASU bakah pawl dang Asom Jatiyatabadi Yuba Chatra Parishad leh Krishak Mukti Sangram Samiti-te pawh kum eng emaw chen chu mega dam siam tur hi an lo dodal tawh a ni.

Kum 2003 khan sorkar laipui chuan National Hydroelectric Power Corporation (NHPC) mega project hi a lo pawmsak tawh a, kum 2005 khan hna thawh ṭan niin kum 2014-ah zawhfel tura tih a ni. Mahse hna 60% vel zawhfel a nih hnuah, pawl hrang hrangte dodalna avangin kum 2011 aṭang khan hna thawh hi chawlh lailawk a ni a, hun rei tak an chawlh hnuah an thawh chhunzawm leh ta chauh a ni.

AASU chuan lui mawng lama chengte himna tur sorkarin a ngaihtuah hmasak phawt loh chuan he project hi an dodal chhunzawm zel dawn tih an sawi.