Khasi film ‘Ïewduh’ in National Award 2 la

67th National Film Awards semna, Thawhṭannia New Delhi, Vigyan Bhawan-a neihah Khasi film ‘Ïewduh’ chuan award pahnih, Best Khasi Film leh Best Audiography (Location Sound) a dawng.

Kum 2019 khan he film vek hian 24th Busan International Film Festival-ah Kim Jiseok Award a dawng tawh a, Pune Film Festival-ah Human Spirit Award leh Manila-a Asian Cinematography Awards semnaah Best Asian Cinematographer a lo dawng tawh bawk.

He film hi Shillong-a bazar lian ber, Ïewduh hming chawia siam niin, bazar chhung mipuite chanchin tarlanna a ni. Bazar chhung lane hrang hrang boruak leh mite nitin khawsak dan, an chanchin, midangte nena an inlaichin dante tarlan a ni. Film director hi Pradip Kurbah a ni a, a producer hi Shankar Lal Goenka niin, a film hi minute 95-a rei a ni.

India rama hri leng vangin nikuma semchhuah tura an ruahman, 67th National Film Award hi kuminah sem a ni. Superstar Rajnikanth chu Indian cinema tana a thawhhlawk avangin chawimawina ngaihhlut tak, Film Industry lama chawimawina sang ber Dadasaheb Phalke Award chu hlan a ni.