AP CM-in border district a tlawh

Arunachal Pradesh chief minister Pema Khandu chuan Thawhṭanni khan Tawang district a tlawh a, India-Tibet border-a Yangste post tlawhin he hmuna awm Indian Army-a Sikh Light Infantry regiment officer leh sipaite a kawm nghal a ni.

Chief Minister hian Tawang district-ah hian ni thum chamin, ramrite a tlawh kual a ni. Yangste post bulah hian thla khat vel liam taah khan China leh India sipaite an lo intibuai tawh a, media report chuan China sipai 100 vel chu India ram chinah rawn luh an tum a, India sipaiten an lo nawr let niin an sawi. Sipaite hi kut pawh an inthlak nia sawi a ni bawk.

Khandu chuan Yankee-1 border outpost a tlawh lai thlalak pawh a twitter lamah a tarlang a, ramri vengtu sipaite bula a awm leh an inkawm thei chu nuam a tih thu pawh a tarlang. "Sipaiten uluk taka ramrite an ven avangin kan in lumah thlamuang takin kan awm thei a ni. Sipaite ka hmu a, ka kawm thei chu ka inchhuang hle a ni," a ti.

AP CM hian Yangze leh China-a ramri vengtu sipaite a tlawh dawn bawk a, ramri hrula awm Mago leh Thingbu khaw mite pawh a kawm dawn bawk a ni. CM hi chief secretary Naresh Kumar, commissioner (planning) Prashant Lokhande, commissioner to chief minister Sonam Chombey leh official dangten an ṭawiawm.