Chhiah lak kan tihniam thei lo : Meghalaya minister

Fuel man sang zelin nitin mamawh man thlenga a nghawng avangin Meghalaya-a pawl hrang hrangten fuel-a state sorkarin chhiah a lak tihniam tura an nawrna chu food civil supplies & consumer affairs minister James Sangma chuan chhangin, chhiah lak an tihhniam chuan an state revenue a nghawng dawn avangin an ti thei lo tih a sawi.

Minister chuan state dangte nena khaikhinin Meghalaya state-in fuel-a chhiah a lak chu a hniam ber tih sawiin, tihniam belh leh chu a harsat tur thu a sawi. "Kan chhiah lak hi kan tihniam zel a nih chuan kan state sum hmuhna a tlem ve leh zel dawn. Kan sum lakluh a tlem chuan kan sum hmanna tam tak kan tihtlem a ngai dawn a, hei hian development scheme leh thil dang tam tak a nghawng tel zel dawn a ni," a ti.

Khawvel puma fuel man danglam zel chungchangah tih theih an nei lo tih sawiin, "A man a hniam theih dan tur pawh kan theih angin kan ngaihtuah ve a, mahse thil harsa tak a ni," tiin fuel man sang vanga transportation man sang chuan nitin mamawh thil thlengin a nghawng tih pawh an hriatthiampui thu a sawi.

Meghalaya-ah hian kar liam ta aṭang khan petrol litre khat man hi Rs 100 a chuang tawh a, diesel pawh Rs 95.43 a tling tawh bawk. Fuel man sang zel avangin pawl hrang hrang chuan state sorkar chu value added tax (VAT) a lak chu 50%-a tihniam turin an phut. Sorkar laipuiin petrol litre khatah excise duty Rs 32-33 a lak bakah, state sorkar hian VAT Rs 22-23 a la a, diesel-ah sorkar laipuiin Rs 31.32 lain, state sorkarin VAT Rs 13-14 a la bawk a ni.

Kumin February thla khan state chhunga Taxi Association-ten nawrh an huaihawt avangin sorkar chuan petrol man hi litre khat Rs 5.4 leh diesel litre khat Rs 5.-in alo tihniam tawh a ni.