Tripura : TMC hruaitu Abishek Banerjee-a'n rally neih tum

Trinamool Congress (TMC) national general secretary Abhishek Banerjee chuan October 31 hian Tripura khawpui, Agartala-ah public rally neih a tum tih party leader Kunal Ghosh chuan a sawi.

Ghos chuan civic body election neih hun tur puan a nih tawh avangin an party chuan Model Code of Conduct zawm chungin he ruahmanna hi an siam tih a sawi. November 25 hian urban local body 25-ah inthlan neih a ni dawn a, inthlan neihna tur zingah hian Agaratala Municipal Corporation pawh a tel a ni.

West Bengal state-a rorellai, TMC hian kum 2023-a Tripura assembly inthlan tur thlirin, tun hnaia Tripura-ah an party dinhmun sawhnghet tumin hma an la nasa hle. Party hotu liante pawhin an tlawh fo a ni, hetih lai hian Tripura-a rorellai BJP nen pawh an intibuai fo a ni.

Ghosh chuan thla hnih liam ta chhung khan Tripura-a an party mi leh sate tam tak chuan beih an tawk tih a sawi a, an party worker-te beih an nih chungchangah police lam chuan engmah ti loin an lo thlir tawh niin a sawi bawk. Thawhlehni pawh khan TMC party worker ṭhenkhat leh an motor hmante chu BJP mi leh sa nia hriatten Gomati district-a Amarpur-ah lo beiin, motor pawh an tihchhiat sak a ni.

BJP chuan TMC lian chho zel tur chu an hlau nia sawiin, mi tam takin beih an hlauh avangin an party an zawm thu pawh an sawilang ngam lo niin Ghosh chuan a sawi. Inthlan hunah BJP rorelna dik lo chu mipuiten an vote hmangin an lantir dawn a ni, a ti.

Thawhlehni khan Mahila Trinamool Congress chuan Agartala-a police headquarters kawtah TMC worker-te beihnaa inhnamhnawihte hremna pek putin nawrh an huaihawt a ni.