Assam police-ten 'most wanted' drug supplier an man

Assam police-te chuan Thawhlehni khan Nagaon district-a Naonoi-ah 'most wanted' drugs supplier RK Hopingson an man tih an sawi.

RK Hopingson hi Manipur-a Senapati district-a mi a ni a, hmarchhak state hrang hranga ruihhlo supply-tu lian nia sawi a ni a, Assam police-te hian man tumin an zawng reng a ni.

Thawhlehni khan Hopingson-a motor hi dapin, Dimapur (Nagaland) aṭanga Nagaon district-a a phurh luh, ruihhlo cheng vaibelchhe hnih hu vel an man a ni. Hopingson hian police-te hi lo beiin a tlanchhia a, mahse a tlanchhiatna lamah hliam tuarin police-te hian an man zui a ni.

Assam police-te chuan Thawhṭanni khan Lahorijan-ah ruihhlo zuarte nen inkapin, mi pakhat an kap hliam a, an kut aṭang hian pistol leh a mu bakah heroin gram 600 an man bawk.