Tripura-a VHP member-ten mosque suasam

Vishwa Hindu Parishad (VHP)-ten Bangladesh rama Hindu-te beih duh lohna lantira Tripura-a rally an huaihawtnaah moque an bei a, Muslim dawr pahnih an hal bawk.

North Tripura-a Chamtilla area-ah Thawhlehnia rally neihnaa tel, VHP activist-te chuan mosque chu lungin an vawm a, a kawngkhar an vawmchhia a ni. Hei bakah Rowa Bazar-a Muslim-te dawr pahnih halsakin, dawr dang ṭhenkhat pawh an suasam sak bawk. Pawikhawihna thlenna hmunah hian security force-te tirh nghal an ni tih district Superintendent of police Bhanupada Chakraborty chuan a sawi.

SP Chakraborty chuan buaina chhuah hlauhawm zualna hmunah leh state chhungah mosque hrang hrangah venhim hna khauh taka kalpui nghal a ni tih sawiin, case pawh ziahluh a nih thu a sawi. Mahse man erawh an la nei lo.

Eptu pawl, CPI(M) chuan thuchhuah siamin he thil thleng hi an dem thu an sawi a, state chhung boruak ṭha tihchhiat tumin mi ṭhenkhatin hma an la reng tih an sawi a, mipuite chu boruak ṭha siam turin an ngen. VHP activist-ten dawr an tihchhiatsakte hnenah zangnadawmna pe turin BJP sorkar an phut bawk a ni. Social media lamah pawh dawr an suasam leh an hal lai video-te pawh a darh nasa hle a ni.

BJP thupuangtu, Nabendu Bhattacharya chuan Chamtilla area-a thil thleng hi an hriatpui loh thu a sawi a, hemi rual hian pawikhawihtute chungah police-te chuan action an lak ngei tur thu a sawi.