Meghalaya-ah vaccine lak chhunzawm duh lo tam

Meghalaya state-ah Covid-19 vaccine dose khatna la tawh zingah a dose hnihna lak chhunzawm lo an tam. Dose khatna la tawh hi mi 10,95,389 an awm laiin, an zinga dose hnihna lak hun tawh zinga mi nuai hnih vel chuan an lak chhunzawm duh lo.
Meghalaya joint secretary (health) leh National Health Mission (NHM) director Ram Kumar chuan an state-a Covid-19 hri leng thawh hnihna a nat lai, May, June leh July thla vel khan mipuite chuan vaccine lak chu an ngai pawimawh hle a, mahse August thla tawp lam aṭanga hri lengin ziaawm lam a pan hnuah vaccine la duh hi an tlahniam a, dose khatna la tawh pawhin a dose hnihna hi an la chhunzawm lo tih a sawi.
Ram Kumar chuan mipuiten vaccine an lak chhunzawm hrehna chhan tam tak a awm tih sawiin, a chhan pakhat chu dose khatna an laka side-effect a awm vangte a ni tih a sawi. Tuna hri leng a thlen hma pawhin naupangte hri danna lak chungchangah pawh hetiang hi an lo tawk fo tawh tih a sawi. Hei vang hian department pawhin health camp-te a lo buatsaih phah ṭhin a ni, a ti.
"Vaccine hi siam thar chauh a ni a, hei vang hian mipuite rin ngam tir tur chuan hun pawh a la ngai ve deuh dawn a ni. Tumah la turin kan nawr lui lo a, mahse data leh thil dang hmangin kan inhrilhfiah mek a ni," tiin a sawi.