Hmarchhak kohhran hruaituten Karnataka Kristiante an thlawp

Karnataka Kristianten state sorkarin sakhaw inleh khapna bill siam a tum an dodalna chu an thlawp tih hmarchhaka kohhran hruaitu hrang hrangte chuan an sawi.

October 16 khan Karnataka State Intelligence Department chuan thuchhuah siamin, official-te hnenah Karnataka chhunga phalna nei leh phalna nei loa din Kristian kohhran hrang hrang chanchin lakhawm turin a hriattir a ni. Kristian biak-in awmna tinte pawh enfiah turin hriattir an ni.

Karnataka hian Kristian hi 2% pawh an awm tling lo a, hetianga sakhaw tlem zawkte bituma state sorkarin hma a la hi hmarchhak biala Kristian hruaitute an lawm lo hle.

North East India Regional Bishops’ Council president, Archbishop John Moolachira chuan, "Karnataka Kristiante hi kan lainatin kan thlawp tlat a ni. An buaina hi kan buaina a ni ve zel a ni. State sorkarin sakhaw inleh khapna bill siam a tum hi Kristiante thliarhran tumna a ni," a ti. Karnataka sorkarin sakhaw hrang hrangte hmun pawimawh awmna leh chanchin kimchang hriat a tumna chu an dodal lo a, mahse he hmalakna hi Kristian sakhua chauh ni loin, sakhaw dangte pawh huam tel tir vek se an duh tih a sawi bawk.

India ram mipuite chuan zalenna an nei vek tih sawiin, "Puitlingin ngaihtuahna fim taka a sakhaw vawn a thlak duh a nih chuan a duh anga awm turin zalenna pek ni rawh se. Hei hi kan ram danpui pawhin min phalsak a ni," tiin Archbishop Moolachira chuan a sawi.

Arunachal Pradesh Catholic Association president, Taw Tebin pawhin Karnataka sorkarin sakhaw inleh khapna dan siam a tum chu an duh loh thu a sawi a, "Mi tumahin an sakhua let turin midang an ti lui thei lo. Kristiante hian tihluihna hmangin an inleh luih tir lo," a ti.

United Christian Forum of North East India thupuangtu, Allen Brooks chuan sakhaw inleh khapna dan siam tum chu ram danpui kalh a ni tiin, "Sakhua vang ni loin ka pianna avangin Indian ka ni. Karnataka leh Madhya Pradesh-a thil thleng hi ram mipuite dikna chanvo an neihte tihdal tumna a ni," tiin a sawi.