Union Minister-in all-party sorkar siamtu Nagaland MLA-te fak

Ni hnih chama Nagaland state tlawhtu, union minister of state for Panchayati Raj Kapil Moheshwar Patil chuan Nagaland MLA-te chu an party inmil lohnate dahṭha a, Nagaland state hmasawnna tura eptu awm lohna, all-party sorkar an siam thei chu fakawm a tih thu a sawi.

August 16 khan rorellai, National Democratic Progressive Party (NDPP), Bharatiya Janta Party (BJP), leh Independent MLA pahnih awmna ṭangrual sorkar chu eptu pawl, Naga People's Front (NPF) in zawmin eptu awm lohna, United Democratic Alliance (UDA) sorkar a ding a ni.

Patil chuan Nagaland sorkarin an state-a boruak muanawm leh hmasawnna a awm theihna tura a hmalakna chu lawmawm a tih thu a sawi.

Union Minister hian Ningani khan Dimapur district-a Thahekhu village council hall-cum-multipurpose a hawng a, he building hi hmarchhak state paruk a tlawh tawhah hall lian ber a nih thu a sawi. Patil chuan Mahatma Gandhi duhthusamte tihpuitlin a, thingtlang khuate chu khawpui aia nuam zawka siam chu prime minister Narendra Modi-a thil tum a ni, a ti. Hall hawnna inkhawmah hian Nagland minister for rural development Metsubo Jamir leh MLA - Tovihoto leh Azheto-ten Union Minister hi an ṭawiawm.

Patil hian nimin khan World War II cemetery a tlawh a, Kohima-a T Khel model village-a farmer market siam hawng bawkin, khawtlang hruaitute bakah state sorkar hnuaia department hrang hrang aiawhte meeting a neihpui bawk.