World Heritage Site-a Thembang khua puan a nih theihna atana hma la turin Arunachal Pradesh sorkar nawr

Arunachal Pradesh art & culture and education minister Taba Tedir chuan West Kameng district-a Thembang khua chu UNESCO World Heritage Site list-a telh ve a nih theihna turin a theih angin state sorkar chuan hma a la dawn tih a sawi.

Thembang Heritage Village Council (THVC) leh tualchhung mite chuan World Heritage Site-a hmanlai khua, Thembang khua telh a la ni loh chungchangah sorkar chu hma la turin an nawr a ni. THVC chuan minister hnenah hian memorandum thehlutin, "Kum 2014 khan UNESCO World Heritage Site atan Thembang khua leh Lower Subansiri district-a Ziro Valley-te chu nominate an ni tawh a, mahse tun thlengin final list-ah hian telh an la ni lo," tiin an sawi.

Kum 2015 khan Arunachal Pradesh sorkar chuan Thembang hi state heritage site-ah a lo puang tawh a ni. UNESCO World Heritage Site-a telh a nih chuan an state tana thil ropui leh inchhuanna tur a nih thu memorandum an thehluhah hian an tarlang.

Thembang khua hi meter 2,300-a sang, tlang chhipa inkulh, kum zabi 12 hunlaia historical structure tam tak awmna a ni. A khaw hmar leh chhim tawpah gate a awm ve ve a ni. He khuaa chengte hian an hmanlai tihdan phungte chu a theih angin an la zawm a, khawchhungah mimal hmingin engmah an nei lo a, panchayat system hmanga enkawl vek a ni.