Sikkim-in hmarchhak bialah vawksa supply-tu lian nih tum

Sikkim chief minister Prem Singh Golay chuan an state chu hmarchhak state hrang hrangah vawksa supply-tu nih an tum tih a sawi.

Chief Minister hian Ningani khan Gangtok bul, Saramsa Garden-ah pig productive incentive scheme a hawng a, hetiang scheme siam hmasa ber an nih thu a sawi. He scheme hnuaiah hian vawk pathum aia tam vulhte chu an vawk vulhte kg 50 an tlin hnuah vawk pakhatah Rs 5,000 zel an dawng thei dawn tih a sawi a ni. He chhawmdawlna hi mi pakhatin vawk 20 thleng a dawng thei dawn a, cheng nuai khat thleng an dawng thei dawn a ni.

"Sikkim hi hmarchhak bial puma vawksa supply-tu lian a ni thei ang. Hmarchhakah vawksa demand hi a sang hle a, hei vang hian Sikkim-ah vawk farm lian tak tak siam a, supply kan tum dawn a ni. Vawksa bakah sangha pawh supply kan tum bawk ang.

Sangha khawi pawh uar chhoh an tum thu sawiin, hemi kawnga a tiṭha hnenah lawmmanah cheng nuai hnih an pe dawn tih CM chuan a sawi bawk.

Kumin kumtir lam khan Sikkim sorkar hian bawng vulhtu ṭhate hnenah chawimawina hi a lo hlan tawh bawk. State sorkarin bawngvulhtute tan chhawmdawlna siama, bawnghute litre khatah incentive Rs 8 zel a pek avanign an state-a bawnghnute an thar chhuah zat hi nikhatah litre 15,000 aṭangin litre 55,000-ah a pung chho tawh a ni. Golay chuan bawng vulhtute hnena incentive an pekah hian state sorkar chuan cheng vaibelchhe 13 vel a seng tawh tih a sawi.

CM chuan ar leh kel vulhtute tan pawh hamṭhatna an dawn theihna tur scheme siam a nih thu a sawi bawk.