Meghalaya Ampati by-election-ah Congress in vote 3191 in hnehna chang

Meghalaya Ampati Consti­tuency by-election result chu nimin khan puan a ni ta a, eptu pawl lam, Congress candidate Miani D Shira chuan sorkar lai NPP candidate Clement G Momin chu hnehin hnehna a chang.

Nimina vote chhiarnaah hian Congress hian hma han hruai ṭhin mah se NPP hian an rawn umpha ve leh ṭhin a, vote hi round nga a chhiar niin round hnihnaah phei chuan NPP hian hma te an hruai hman a, mahse vote chhiar zawh a nih meuh chuan Congress lam an che ṭha ta zawk a ni.

Congress candidate Miani D Shira hi chief minister hlui leh opposition party leader ni bawk Dr. Mukul Sangma fanu upa ber niin kum 27 mi chauh a la ni a, politics-ah hian mi thar a ni nghe nghe.

Shira hian a khingpui NPP candidate Clement G Momin hi vote 3191in a hneh a ni.

Result chhiar zawh a nih hnu hian report chuan Congress candidate hian vote 14,259 a hmuh laiin NPP candidate hian vote 11,068 a hmu thung tih an tarlang a, hetih lai hian Independent candiate chuan vote 306 hmu in NOTA-ah vote 208 a tla bawk.

NPP candidate hi Megha­laya-a sorkarna siam mek ṭang­rual pawl Meghalaya Democratic Alliance (MDA)-a BJP, UDP, HSPDP, PDF ṭangrual te chuan thlawp mah se Congress hi an hneh zo ta lo a ni.

Garo Hills-a Ampati consti­tuecy by-election hi May 28 khan neih a ni a, vote pawh a tla ṭha hle a, 90.42% a tla a ni.

Ampati constituency-ah hian term nga chhung CM hlui Mukul Sangma kha thlan tlin a ni a, kum 25 chhung he bial aiawh hian a ding a, tunah hian a fanu in a thlak ve thung dawn a ni.

Mukul Sangma hi February 27 Assembly inthlanah khan Ampati leh Songsak-ah a ding a, a tling ve ve a, Ampati-ah hian a nihna takah chuan term ruk a zawna thlan tlin a ni a, mahse Sonsak constituency bial aiawha din hi a thlan zawk avangin Ampati hi a ruak a, inthlan ṭhat an neih phah ta a ni.