Tripura zirlai suicide case : Auxilium School Principal in mawh a phur loh thu sawi

Tripura State National Students Union of India (NSUI) chuan zirlai mahni nunna la a inawkhlum ta Lahari Debbarma case kalzelah Nilaini khan a school kalna Auxilium Girls School, Agartala chu an tlawh a, school principal Sister Celina D’Cunha pawh hmuin zawhna te an zawt a ni.

School Principal chuan Lahari nu chu a fimkhur tawk loh thu a sawi ve thung a, Lahari nu chu tu nen nge Agartala-ah an kal tih leh nilengin eng nge an tih a zawh chuan a nu chuan a patea nen an kal thu-a a chhan thu a sawi. A kalpui chu t a hria em tia a zawh chuan a nu chuan a hriat loh thua a chhan thu a sawi bawk a, ina a lo haw hnuah nilengin eng nge a tih leh tu nen nge an awm tia a zawh pawhin a nu chuan engmah a hriatpui loh thu in a chhang bawk niin a sawi.

Lahari Debbarma case hi state sorkar chuan CID kutah an hlan tawh a, CID chu an duh ang taka hma la turin thuneihna an pe zui bawk a ni. Mahse NSUI chu hemi chungchangah hian an lungawi vak lo a, CID hmalaknaah leh an thil chhui danah hian an lungsi zan lo thung.

Tripura State NSUI President, Rakesh Das chuan Auxilium School Principal chuan Lahari thih chhanah hian mawh an phur loh thu a sawi thu leh zirlai beiseiawm tak an chan chu pawi an tih thu a sawi niin a tarlang a, Principal chuan CID-ten case chu dik takin chhui se a nunna a lak chhan tak an chhuichhuah chuan action na takin la se a duh thu a sawi tih a sawi bawk.

Rakesh Das chuan dik tak leh mumal taka case chu chhui an duh thu sawiin CID-te chu an rintawk loh thu a sawi bawk a, state-a case an neih tawhah record an nei ṭha lo hle tih sawiin Anuwara Hussain case-ah pawh khan an thil chhui danah an duhthu a sam loh thu a sawi a ni.

Lahiri hi Big Bazaar-a an zirtirtute thlahna tur thil an lei naah thil rua puh a ni a, nasa taka a phat hnuah an zirtirtu in Rs 4,000 senga a khulchhuah hnuah school lamah nasa taka hauh a nih thu sawi a ni a, hemi vang hian a rilru na chu a tukah a inawkhlum ta niin report chuan a tarlang.