Nagaland : NDPP in vote 173,746 in hnehna chang

Nagaland Lok Sabha by-election result chu Ningani khan chhiar a ni a, rorel lai People’s Democratic Alliance (PDA) aiawh Nationalist Democratic Prog­ressive Party (NDPP) candi­date Tokheho Yepthomi chuan vote 173,746 in hnehna a chang.

Eptu pawl Naga People’s Front (NPF) candidate C Apok Jamir chu Congress leh Aam Aadmi Party (AAP) ten thlawp mah se hnehna an chang zo ta lo a ni.

Nagaland Lok Sabha by-election hi May 28 khan neih a ni a, vote hi 75% a tla. May 29 khan Election Commission of India thupek angin Kubza-ah inthlanna hi an nei ṭha leh a ni. Kubza-ah hian mi ṭhenkhatin EVM an tichhia a, hemi vang hian inthlang ṭha leh tur hian ECI chuan thupek an chhuah.

Nagaland Lok Sabha seat hi Chief Minister ni mek Neiphiu Rio-an Assembly inthlan dawn khan Chief Ministerial candidate a nih dawn avangin a chhuahsan a, hemi avang hian inthlan ṭhat hi buatsaih a ni.

Hnehna chang zo ta lo NPF candidate C Apok Jamir hi Rajya Sabha member hlui a ni a, Nagaland Chief Minister hlui SC Jamir fapa a ni bawk.

Tokheho Yepthomi hian vote 5,94,205-a hmu a, hetih lai hian C Apok Jamir hian vote 4,20,459-a hmu thung a, none of the above (NOTA) thlang mi 3,991 an awm bawk a ni.

Vote hi zing dar 8-ah chhiar ṭan a ni a, tlai dar 5.30-ah khan chhiar zawh a ni chauh a, NDPP candidate hi PDA-a an thawpui National People’s Party, JD (United) leh Independent-ten an thlawp thung.

Nagaland Assembly inthlan hi February 28 khan neih a ni a, NPF hi party mala seat hmu tam ber niin seat 26 an la a, mahse heti chung hian NDPP-BJP ṭang­rual te hian sorkarna an siam thung a, NDPP hian seat 18 la in BJP hian seat 12 an la thung a ni.