Meghalaya: Shillong-a buaina chhuak vangin curfew puang

Ningani zingah khan Meghalaya state khawpui Shillong-a Motphran hmunah buaina a chhuak a, mipui te leh police-te an innek buai a, mahse East Khasi Hills District thuneitu lam chuan boruak hi an thunun thei a ni. Buaina chhuak zui zel thei laka inven nan curfew puan zui nghal a ni.

Shillong Times in a tarlan dan chuan Ningani zingah khan Punjabi lane-a SPTS bus driver-ten nu ṭhenkhat public tap-a tuichawi an chhaih vanga buaina hi irhchhuak niin an ziak a, mi ṭhenkhat chuan Motphran-a hmeichhe naupang pakhat bus in a sut vangin tualchhung mipui lungawi lo in bus khalhtute hi an bei niin an sawi bawk a, buaina chhuah chhan thu mum tak hriat a ni lo.

Buaina chhuah hun hi zingkar hma takah ni mah se chawhnu lamah khan mi 200-300 rual vel chuan Punjabi lane hi an pankhawm a, bus te hi lungin an vawm niin report chuan a tarlang. Police-te chuan hma la mah se police-te hi lungin pungkhawm mi ṭhenkhat hian an vawm nia tarlan a ni a, buaina siamtu te hian tyre leh kawngsira thil eng eng emaw chu an hal nual a ni. Buaina chhuakah hian journalist ṭhenkhat chu an thla la lo turin vau an nih thu Shillong Times chuan a tarlang a. journalist ṭhenkhat chu lungin an vawm ve bawk niin an tarlang bawk.

Buaina chhuak zui leh thut thei avangin dan leh thupek bawhchhiat a nih lohna turin Ningani tlai khan thuneitu lam chuan June 1 aṭanga June 4 thleng curfew hi an puang ta a ni.

District deputy co­mmi­­ssioner, PS Dkhar chuan Section 144 CrPC hnuiah curfew hi puan a nih thu sawiin Shillong khawpui chhunga hmun ṭhenkhat Jaiaw, Mawkhar, Umsohsun, Raitsamthiah, Wahingdoh, Mission Mawprem, Lumdiengjri, Lamavilla, Qualapatty, Wahthapbru, Sunny Hill, Cantonment leh Mawlong Hat (Umshyrpi bridge piahlam tel lo in)-te hi curfew hian a huam dawn tih a sawi.