Meghalaya : Shillong-ah tiamchin awm loin Night Curfew puang

Meghalaya khawpui Shillong-ah chuan tun hnaia Motphran hmuna buaina chhuak avang khan boruak sosang tihrehna turin Inrinni aṭang khan tiamchin awm loin Night Curfew puan a ni.

Motphran-ah hian kar liam ta Ningani leh Zirtawpni khan buaina nasa tak a chhuak a, boruak sosang zel tur ven nan leh boruak duhawm lo chhuak thut thei laka inven nan zan dar 10:00 aṭanga zing dar 5:00 thlengin zantin curfew puan a ni. East Khasi Hills deputy commissioner PS Dkhar chuan thupek hi a chhuah a, thu leh amw hma loh chu kenkawh a nih tur thu a sawi. Curfew hian Lumdiengjri Police Station area huamchhung chin a huam tih a sawi bawk.

Home Minister, James K Sangma pawhin mipuite chu remna leh muanna a awm leh theih nana buaina siam lo turin a lo ngen tawh bawk a, buaina chhuaka Them Iew Mawlong-a mipa naupang pathum kut thlaktute pawh man an nih tawh thu a sawi a ni.

James K Sangma chuan Shillong mipuite chu buaina siam zawnga khawsa lo tura chahin, social media-ah pawh thu dik lo thehdarh lo turin a chah bawk.

Meghalaya police-te hian buaina thlentu nia rinhleh mi eng emaw zat chu Zirtawpni khan an man tawh a, a bulṭan tu ber nia rinhleh SPTS bus conductor-te pawh an man thawh thu, police te chuan an sawi.

Buaina nasa tak chhuak avang hian internet lama thu dik lo thehdarh tur venna atan Zirtawpni khan phone internet service te chu tihtawp a ni.

Zirtawpni chawhnu khan Sipai-te chuan khawpui fangin flag march-te an nei a, dan leh thupek khauh takin an kengkawh a, mahse sipai-te hian flag march hi chu an nei tawh rih dawn lo tih an tarlang thung.

Deputy Commissioner, PS Dkhar chuan sipaite chu an inralrin reng thu leh buaina a chhuah thut pawha thunun thei turin an inpeih reng thu a sawi.

East Khasi Hills District thuneitute chuan an district huamchhungah CrPC Section 144 tlawhchhanin petrol, diesel leh tuialhthei dangte a black-a zawrh leh, bottle emaw container danga hmanga lak khapna dan hman a nih thu an puangzar nghal bawk.

Delhi MLA-in Shillong tlawh:
Shillong-a buaina chhuakah Sikh community lakah tihduhdahna a nasa tih thu a than nasat avang leh kut thlak an nih thu internet lamah a darh nasat avangin thil awm dan enfiah turin Delhi MLA leh Delhi Sikh Gurdwara Management Committee general secretary ni bawk, Manjinder Singh Sirsa chuan Pathianni khan Shillong a tlawh.

Delhi MLA chuan thuchhuah siam nghalin a twitter-ah Sikh mite chu an him thu leh Sikh mipuite lakah hleihlenna a nasa tih tarlan chu thu dik lo a nih thu a ziak. Sirsa chuan buaina leh manganna tur a awm loh thu leh thuthang dik lo mai a nih thu a ziak bawk.

Sirsa chuan rampuma Sikh awm te chu thu thawn nghalin India mipui zawng zawng chu Sikh te an him a ni tih hre tura a duh thu a sawi bawk a, Meghalaya-a Sikh-te chu mi zawng zawngin an ngaihtuah hle thu leh a hmun ngei aṭangin buaina a awm loh thu a finfiah thu a twitter-ah a post a ni.

Meghalaya Chief Minister pawhin buaina chhuak chungchangah hian thupek tichhuakin social media leh internet lama thu dik lo post an awm chuan an lakah action na taka lak a nih tur thu a lo sawi tawh bawk a ni.