Arunachal Pradesh Congress-in President rule ngiat

Arunachal Pradesh Congress Comittee chuan Inrinni khan Pema Khandu sorkar chu nasa taka sawiselin panchayat polls an tikhawtlai chu an dem thu an sawi a, dan leh thupek kenkawhna kawngah an hlawhchham nia sawiin a rang thei ang bera state chhunga president rule hman nghal an duh thu an sawi.

Panchayat term hi kar liamta Thawhṭanni khan a tawp tawh a, APCC chuan state sorkar chu pamchayat inthlan hun an sawn avang leh an tihkhawtlai avangin an dem thu an sawi a, state chhungah dan leh thupek an bawhchhe nasa tih an sawi.

Hemi a nih avang hian ruk­rukna, tualthahna leh pawng­sualna, mi ruk bo leh ruihhlo hmanga sumdawnna a hluar hle tih an sawi bawk.

Hei vang hian APCC chuan chief minister Pema Khandu chu mawhphurhna la ngama chief minister a nihna aṭanga inhnukdawk ngam turin an ti a ni.

APCC vice-president Minkir Lollen chuan panchayati raj secretary leh special secretary-te chuan panchayati raj sysytem state chhunga tihbo a nih tur thu a hran ve ve in thuchhuah an siam thu a sawi a, hei hian miouite a tichiai nasa hle tih a sawi. Itanagar leh Pasighat municipal polls puan a nih hnuah pawh municipal leh panchayat election tur pawh ṭhulh leh a nih thu a sawi a, heng zawng zawng hian state sorkar chu nuihzat burah a siam tih a sawi.

Lollen chuan Municipal inthlan ṭhulh a nih chhanah khawchhiat vang leh ruahsur nasa an mawhpuh thu a sawi a, mahse 2013 municipal inthlanah pawh inthlanna tluang taka neih a nih tho thu leh ramri khua leh thingtlangah-te pawh harsatna an tawh loh thu a sawi a ni.

Congress chuan BJP sor­kar hnuah state chhungah hma­sawnna Trans-Arunachal High­way tih loh chu thildang hmuh tur a awm lo tih an sawi a, state sorkar chu thutiam hlen loah an puh bawk.