Shillong buaina chhuak kha tumreng vang a ni : Conrad Sangma

Meghalaya Chief Minister Corad K Sangma chuan May 31 chawhnu lama state khawpui Shi­llong-a Motphran hmuna buaina nasa tak chhuak chu sponsor tu an awm thu Pathianni khan sawi.

Chief Minister chuan buaina chhuah theih nana sum thehchuak hial an awm tih chhuichianna aṭanga a lan thu sawiin finfiahna awm te chuan helam hawizawng hi a kawk tih a sawi a ni.

Home Minister James Sang­ma, Director General of Police Swaraj Bir Singh leh official dangte nena emergency meeting an neih hnu lawka media hmaa thu a sawinaah Chief Minister chuan, police-ten buaina chawh chhuah a nih theih nana sum hmanga mi thlem an awm tih an hmuhchhuah thu a sawi.

Conrad Sangma chuan buai­na siamtute hnenah hian zu leh pawisa an pe ngei a ni tih finfiahna an neih thu a sawi a, mi ṭhenkhat pawhin pawisa an hmuh avanga buaina chhuahna hmuna an kal ngei thu an sawi tih a sawi a ni. CM chuan heng buaina chhuah theih nana pawisa petu te hi an zawnchhuah dawn thu leh khawi aṭanga pawisa hi sem nge an ni tih an chhui dawn thu a sawi bawk.

CM chuan heng mite hi an chhuichhuah hunah an lakah na taka action an lak dawn thu a sawi bawk a ni.

Politician inrawlh an awm em tia zawhna chu chhangin CM chuan hming sawilan an duh loh thu leh buaina chhuak chu politicize a tum loh thu a sawi a, an la chhui zel dawn thu a sawi.

Shillong-a buaina chhuak vang hian Sikh aiawh leh Delhi MLA ni bawk Manjinder Singh Sirsa pawhin Pathianni khan Chief Minister hi a lo hmu tawh a, Sikh mite an him chu lawmawm a tih thu a lo sawi tawh bawk a ni.

Home Minister James Sangma pawhin internet leh social media lama thu dik lo thehdarh an awm chuan an lakah action lak a nih tur thu a lo sawi tawh bawk.

Minister of Satate for Home Affairs Kiren Rijiju pawhin Gurudwara leh Sikh institution-te beih nia thuthang chu thuthang dik lo a nih thu lo sawiin mipuite chu thuthang dik lo laka inveng turin a chah ve bawk a ni.