Chakka band vangin Guwahati-ah nunphung buai

All Assam Motor Transport Association (AAMTA)-te chuan Thawhṭanni khan darkar 24 awh tur chakka bandh an huaihawt a, hemi avang hian nunphung a buai nasa hle.

Thawhṭanni-a bandh-ah hian public transport bus, taxi leh auto-rickshaw zawng zawng an tlanchhuah loh avangin mipui nunphung a buai hle a, Assam State Transport Corporation (ASTC) chuan buaina zualpui tihziaawm nan bus 700 an tlantir a, Guwahati bikah hian bus 200 an tlantir a ni.

ASTC Managing Director AP Tiwary chuan bus an tlantir hi mipuite phurrit chhawkna tur a nih thu a sawi.

AAMTA hian chakka bandh hi tuialhthei man ennawn leh tura an ngiat avanga huaihawt an ni a, he bandh hi pawl hrang hrangin an thlawp a ni. AATMA chuan sorkar in a beng a la chhu ngawng tlat a nih chuan June 11 hian darkar 48 bandh an huaihawt leh dawn tih a sawi bawk.

AATMA president Pulak Go­swami chuan state sorkar chuan October 11, 2012 khan tuialh­thei man hi an ennawn thu sawiin hemi hnu hian vawikhat mah ennawn a nih leh tawh loh thu leh a man hi a san chhoh zel thu a sawi. Goswami chuan state sorkar hnenah memorandum an thehluh thu sawiin vawi hnih lai an thehluh hnuah pawh chhanletna, a lawmawm lam an la dawn loh thu a sawi a ni.