Sorkarin Shillong buaina chingfel tur Panel din dawn

Meghalaya Democratic Alliance sorkar chuan Thawh­ṭanni khan all-party meeting neiin state khawpui Shillong-a Punjabi Lane-a buaina chhuak chinfel dan tur ngaih­tuahtu tur panel din turin thutlukna an siam.

Hetih lai hian Thawhṭanni-a meeting an neih lai hian mi ṭhenkhat chu state Secretariat-ah lutin Punjabi lane-a awm te sawnchhuah an ngiat a, Chief Minister Conrad Sangma erawh chuan heng mite hian buaina siam an tum loh thu a sawi thung. Chief Minister chuan memorandum thehluh tum mai an nih thu leh buaina chhuak vanga an harsatna tawh te rawn thlen tum mai an nih thu a sawi.

Thawhṭanni-a High level committee meeting, member pasarih awmna hi Deputy Chief Minister Prestone Tynsong-an a kaihhruai a ni.

Shillong-ah hian Curfew hi la chhunzawm zel a ni a, Sipai te pawhin Thawhṭanni khan flag march a vawihnih nan buaina nasat zualna laiah an nei leh bawk.

Shillong-ah hian May 31 khan Motphran-a Punjabi lane-ah bus operator-te leh tualchhung mite inkarah buaina nasa tak a chhuak a ni. Buaina chhuakah hian mi eng emaw zat in hliam an tuar bawk a, mipuite leh police-te pawh nasa takin an innawr buai nghe nghe.

Punjabi lane hi Sikh tamna hmun a nih avangin media lamah Sikh te lakah hleihlenna a nasa niin thu lengvak a tam hle a, mahse hei hi Delhi MLA leh Sikh ni bawk, Meghalaya-a zin Manjinder Singh Sirsa chuan thu belhchian dawl lo a nih thu a sawi a ni.

Hetih lai hian Thawhṭanni vek khan Punjab sor­kar hnuaia mi pali, Minister of Jail and Cooperation, Sukhjinder Randhawa kaihhruai chu Shillong-a thil awmdan enfiah turin an kal a, chief minister an kawm nghal bawk.

Punhab sorkar aiawh te hian Chief Minister hnenah hian Sikh himna ngaipawimawh tura ngenin CM pawhin Sikh-te chu venhim an ni dawn tih a lo hrilh thu an sawi a ni.

Punjab Minister of Jail and Cooperation chuan Meghalaya-a Sikh awmte chu an him thu leh state sorkarin an theihtawp-a an support thu a sawi bawk.