Hri kai an pun leh avangin SOP kalpui ṭha turin Assam hriattir

Sorkar laipui chuan Assam sorkar hnenah an state-a Covid-19 hri kai an pun leh avangin Covid kaihhruaina dante khauh taka kengkawh turin a hriattir. Assam sorkar bakah hri kai punna dang, West Bengal sorkar hnenah pawh hriattirna hi a pe bawk.

Assam chief secretary hnenah lehkha a thawnah, union health ministry-a additional secretary Arti Ahuja chuan Assam-ah weekly positive rate chu a pung chho leh tih a sawi. October 20 -26 aṭang khan weekly positive rate hi 41% in a pung a ni.

Ahuja chuan test neih zat pawh a tlahniam hle tih sawiin, September 28 - October 4 chhunga sample 1,64,071 test a nih laiin, October 19 -25 inkara test neih zat chu 1,27,048 ah a tlahniam tih a sawi. Positivity rate a pun chhoh leh avangin RT-PCR test tam zawk an neih leh a ngai a ni, a ti.

District pahnih - Barpeta leh Kamrup Metro te chu hri kai tamna leh weekly positivity rate sanna a nih avangin ngaihven an ngai zual tih additional secretary chuan a sawi bawk.

Assam-ah hian October 13-19 inkar kha hri kai thar hi 4,277 an awm a, October 20-26 inkar khan 6,040 an awm belh leh bawk. Kar li liam ta atang khan positivity rate hi a pung chho leh ṭan a ni.