Tripura HC-in state sorkar hnenah hriattirna pe

Tripura High Court chuan tun hnaia Panisagar-a Vishwa Hindu Parishad (VHP)-ten rally an huaihawt ṭuma buaina thleng chungchangah state sorkar chu a hma lak dante sawi turin a hriattir a, November 10 hmaa chhanna pe turin a hrilh.

Chief justice Indrajit Mahanty leh justice Subhasish Talapatra awmna division bench chuan Inrinni liam ta khan Pasinagar case hi ngaihtuahin, Tripura sorkae chu November 10 hmaa affidavit thehlut a, chi/sakhaw inkar buaina chhuak thin veng tura ruahmanna a siam dante, buaina chhuak a buaipui dante sawi turin a ti a ni.

Division bench chuan district level chauh nilo, sub-division level ah pawh peace committee siam dan ngaihtuah turin state sorkar chu a hrilh a, boruak tha leh muanawm a awm theihna turin political party hrang hrangte chu an hmalaknaa tel tura sawm turin a hrilh bawk.

Court chuan media mite, a bikin print media te chu state chhung boruak ṭha a awm theihna turin theihtawp chhuah turin a ngen. Social media platform-a thu dik lo thehdarh ṭhinte lakah action la turin state sorkar chu a hrilh a, thu dik lo thehdarh ṭhinte veng turin a ti bawk.